Serchhip District-a COVID-19 Vaccine la thei zingah 2218 ten an la la lo nia hriat a ni

Serchhip District-a COVID-19 vaccine la thei zingah mi 2218 te chuan vaccine hi an la la lo nia hriat niin Vaccine la thei zinga za zela 87.6 te chuan vaccine Dose 1-na an la tawh nia chhinchhiah a ni.

Serchhip District Surveillance Officer Dr. Lalngaihawmi Chhangte chuan he thu hi nimin khan sawiin Serchhip District-ah hian kum 18 chunglam COVID-19 vaccine la thei te zinga za zea 87.6 te chuan Dose 1-na la tawhin heng atanga za zela 83 vel te chuan Dose 2-na an la leh tawh bawk a, tunah hian Vaccine la lo hi mi 2218 vel an awm nia chhinchhiah an nih thu a sawi bawk. Damlohna avanga pawn-a chhuak theilo te vaccine pe tura hmalakna chungchanga thuthar thehdarhtute zawhna chhangin DSO chuan, Serchhip District-ah hetianga pawn chhuak theilo hi mi 68 vel an awm nia chhinchhiah a nih thu leh hetiang bawk hian rualbanlo mi 16 an awm nia chhinchhiah a nih thu a sawi a, heng mite pawh hi vaccine pe tura hmalak mek a nih thu a sawi bawk.

Nimin-a thuthar thehdahtute a kawmna ah District Bawrhsap Kumar Abhishek pawhin Serchhip District-ah COVID-19 Vaccine la duhlo engemawzat kan awm tih hriat a ni tih sawiin, “Khawngaih takin vaccine hi a la thei tur chin zawng zawngten lo la ngei turin ka ngen cheu a ni,” a ti a, Second Dose lak hunte pawhin vaccine la chhunzawm ngei turin a ngen bawk a. Vaccine la tura Centre pan theilo, damlohna khirh bik neite chuan Medical thawktute hriattir tur a ni tih sawiin, In lamah an pan chilh zel thei tih a sawi a, “Vaccine la duhlote vanga Vaccine la duhte dinhmun him lova an awm dawn ai chuan, a la ve duhlote khuahkhirhna Dan siam a tul palh ang tihte a hlauhawm a. Vaccine hi a himin tha takin hna a thawk a ni tih finfiah tawh a ni a. Lak duhloh chhan tur a awm lo a ni,” tiin Vaccine la thei chin te chu la theuh turin a sawm a ni.

Chhinchhiahna atanga a lan danin kumin January thla-a Serchhip District-a COVID-19 Vaccine pek kalpui a nih atangin Serchhip District-a Healthcare Workers 748 ten vaccine Dose 1-na la tawhin an zinga 777 ten Dose 2-na an la tawh a. Frontline Workers 3983 ten Dose 1-na la tawhin an zinga 3693 ten Dose 2-na an la tawh bawk a. Kum 18 leh 44 inkar mi 22,185 ten Dose 1-na la tawhin an zinga 17,429 ten Dose 2-na an la tawh a. Kum 45-59 zingah mi 8675 ten Dose 1-na la tawhin 7883 ten Dose 2-na an la tawh bawk a. Kum 60 chunglam zingah mi 5431 ten Dose 1-na la tawhin an zinga 5262 ten Dose 2-na an la tawh bawk a ni.