Serchhip District-ah COVID-19 vang thi mi 5 te Ex-Gratia pek theih tura tihfel a ni tawh

COVID-19 avanga thi chhung ten Serchhip DC Office-a COVID-19 Ex-gratia dilna an thehluh atangin mi 5 te dilna chu pawmsak ni tawhin sum pawh pekchhuah tura sanction a ni tawh a, COVID-19 Ex-gratia diltu chuan an chhung thi ta chu COVID-19 vanga thi a ni ngei a ni tih tarlanna ‘Death Certificate’ an neih a ngai a ni.

Supreme Court thuchhuak ang leh National Disaster Management Authority (NDMA) leh Ministry of Health & Family Welfare-in inkaihhruaina a siam angin Mizoram Sawrkar chuan COVID-19 vanga nunna chan chhungte (next of kin) tan zangnadawmna (ex-gratia) Rs. 50,000/- zel a pe dawn a. Zangnadawmna (Ex-gratia) dil turte chuan an chenna District-a Deputy Commissioner (DC) hnenah Sawrkar form siamsa hmangin dilna an thehlut tur a nih angin Serchhip DC Office-ah pawh dilna lut hi a awm belh mek zel a, nimin thleng khan dilna 10 vel lut tawhin, sawrkar in ruahmanna a siam angin heng dilna te hi ti khawtlai lovin bawhzui nghal zel a ni a. Nimin thleng khan Serchhip DC Office-a dilna lut zingah hian mi 5 te dilna chu pawm ni tawhin an zinga pakhat chuan pawisa hi an lachhuak tawh a, midang 4 te pawh hi pekchhuah mai theiha peihfel a ni tawh a ni.

Sawrkar thuchhuah in a lo tarlan tawh angin COVID-19 Ex-gratia diltu chuan an chhung thi ta chu COVID-19 vanga thi a ni ngei a ni tih tarlanna ‘Death Certificate’ an thil tel tur a ni a, Damdawi In-a thi tan Form 4; Damdawi In pawn lama thi tan Form 4A leh Form 4 emaw 4A nei remchang lo tan COVID-19 Death Ascertaining Committee (CDAC)-te pawmpui Certificate thil tel tur niin Death Certificate chungchang emaw, mitthi thih chhan chungchangah harsatna nei an awm chuan an chenna District-a DC Office-ah, COVID-19 Death Ascertaining Committee (CDAC)-te ngaihtuah turin ziakin complain thlen theih a ni a. Mizoram-a cheng nghet (permanent resident), State pawna COVID-19 vanga boral chhungte pawhin document tul te thil telin an dil thei a ni. Thudawn danin he ruahmanna hnuaia Ex-gratia dawng thei te hi COVID-19 vanga thi an ni ngei tur a ni a, hri kai enkawlna hmuna awm, accident leh chhan dang vanga thi te erawh he ruahmanna hian a huam lo thung a ni.