Luidung nungcha man phalloh hun hmang mek

Mizoram sawrkar chuan October 10, 2021 atanga December 18, 2021 chhung hi Luidung Nungchate Man Phalloh Hun (Closed Season) atan a puang mek.

Mizoram sawrkar in Closed Season a puan mek denchhen hian Fisheries Department Director F. Vanlallawma chuan nimin khan Dialdawk lui-a Sangha fuan tur vengtu Lengpui Model Branch YMA Duty te chu a tlawh a, he hunah hian Fisheries Department Director chuan YMA member tlawmngai-a an huamchhung luidunga Sangha fuan tur vengtute hnenah lawmthu sawiin, luidunga nungcha te kan tih chereu nasat avangin Mizoram-a luite chu a ruakin a bawlhhlawh em em tih a sawi a. YMA ten an mahni huamchhung luite an humhalh chu thangthar lo awm leh zel turte tan a pawimawh tak zet a ni, tiin luidung ah nungcha chi hrang hrangte zalen taka an awm a, an lo inthlah pun zel theih nan Luidung Nungcha Man Phalloh Hun (Closed season) puan a nih chhung phei chuan YMA te chu an huam chhung luite uluk lehzuala venghim turin a ngen a ni.

Mizoram sawrkar-in luidung nungchate man phalloh hun a puan chhung hian luidung nungcha te man leh an fuan tur tihbuai te, nghafuan ruh te chu khap tlat a ni tih a sawiin Vanlallawma chuan, sawrkar thupek pawisa lo te chu The Mizoram Fisheries (Amendment) Act, 2016 Section 5(1) leh (2) hmangin Jail-a tantir leh pawisa chawi a hrem theih an nih thu leh sawrkar thupek hi zawm a, pawisa turin mitin a ngen bawk.

Closed Season chhung hian Fisheries Department chuan District Office hrang hrangte pawh an huamchhung Hghafuan venghima YMA duty na hmunte tlawh turin ruahmanna a siam a. Hmun hrang hrangah duty te insiamin luidungte chu uluk takin an vil reng dawn a. Sangha fuan turte chu tha taka an inthlah pun theih nan mitin thawhpuiah an sawm a ni.