Serchhip-a mimal hnena a pung um-a sum dah chhuina Police ten an titawp tawh

Mi thenkhat ten Serchhip-a mimal pakhat hnena a pung um-a sum an dahkhawm chungchanga harsatna thleng chu Serchhip Police ten hun engemaw chen an buaipui hnuah sum dahtu (Depositor) te duhdan angin thubuai siam lova tihtawp a ni a, heng mite sum hi an dahna te hian kum 7 chhunga rul turin intiamkamna ziah a ni thung.

Kumin August 19 atanga mipui ten an hriat lar Jenny Malsawmtluangi, Serchhip Dinthar Veng hnena mi thenkhat ten a pung um-a sum an dah chungchang Serchhip Police ten an chhui zui dan LENKAWL zawhna chhangin Serchhip Police te chuan, hemi chungchang hi an chhui zui hnuah a (Jenny-i) hnena sum dahtu intelkhawm, Money Depositor Group inti te chuan Jenny Malsawmtluangi chunga case siam lo tura ngenna an thlen angin thubuai siam lovin hemi chungchang an chhuina leh hma an lakna chu an titawp tih an sawi a, DC Office-ah erawh hemi chungchang hi report siam a ni tih an sawi a. Hetiang a nih avang hian a hma lama Jenny Malsawmtluangi dawr-a bungrua an man te chu pe kirin a dawr an kalh sak te pawh an hawn sak leh vek tawh thu an sawi a ni.

Money Depositor Group-a President chuan LENKAWL zawhna chhangin Serchhip Police te hnenah hian an duhdan an thlen ve thu sawiin, hetah hian Jenny-i hnena an pawisa dah te hi hmuhlet leh vek an duh ber thu leh a tlem thei ang ber hloh an duh tih a sawi a. Hemi ang hian Jenny Malsawmtluanga te nen hian an pawisa a bat sak an pek let/rulh lehna turin ruahmanna an siam thu leh an ruahman ang chuan kum sarih (7) chhunga an pawisa a bat te hi rulh zawk vek a intiam tih an sawi a. Hetianga an pawisa hmuhlet lehna tura ruahmanna an siam laia Criminal Case siama Jenny-i man-a Jail tan tir emaw, Mizoram Protection of Interest of Depositor (MPID) hmanga hmalak emaw a nih chuan harsatna a thleng thei nia an hriat avangin hetiang zawng hian hma la lo turin an ngen tih a sawi bawk.

Money Depositor Group hruaitute hian Serchhip-a Judicial Magistrate hmaa Affidavit an siam ah Jenny Malsawmtluangi hian intiamna a ziah thu sawiin, hetah hian kum 2017 atang khan mi 67 te hnen atangin Rs. 475,50,800/- a hman sak thu leh heng pawisa te hi a bat sak ngei thu leh a rul leh ngei ang tih a intiam thu an sawi a. He intiamna ang hian kum khatna chhungin zaa 30, kum hnihna leh kum thumna chhungin zaa 20 ve ve, kum lina leh kum ngana chhungin zaa 10 ve ve leh kum rukna leh kum sarihna ah zaa 5-a rul tur a ni tih an sawi a. He a intiamna ang hian pawisa hi a rulh ngei an beisei thu leh a rul lo a nih erawh chuan a intiamna a bawhchhia a nih avangin a tul anga hma an lak zui tur thu an sawi bawk.