Serchhip District in COVID-19 hri kai enkawllai tam lamah pathumna dinhmun a luah mek

Serchhip District Bawrhsap leh District Disaster Management Authority (DDMA) Chairman, Kumar Abhishek IAS chuan Serchhip District chu Mizoram District zingah COVID-19 hri kai enkawllai tam lamah pathumna a ni mek tih sawiin, hei vang hian mipui ten Mask hman kan ngaih pawimawh a tul thu a sawi.


COVID-19 hri leng dona atana mipui ten tha taka hmai tuamna (Mask) an hman theihna tura inzirtirna tun thla chhung neih tura hmalak dan tur chungchangah nimin khan District Bawrhsap hian Serchhip DC Meeting Hall-ah thuthar thehdarhtute kawmin nimin zing-a COVID-19 dinhmun tarlan thar ah Serchhip District chuan District hrang hrang zingah hri kai enkawllai tam lamah pathumna dinhmun luah mekin tunhnaiah hri kai hi an pun chhoh mek thu a sawi a. Health Minister in All Mask Campaign (Mask for All) chu Mizoram-a kalpui tura a lo hawn tawh thu leh he Campaign hi tun thla chhung kalpui tur niin kan dinhmun enin hei hi thil pawimawh tawpkhawk a tling tih a sawi a. Tuna Serchhip District-a hri kai pung zel tihtlem theihna awmchhun chu Mask vuah reng, inhlata awm, Kut sil fo leh pawn chhuah tlem te a nih thu sawiin, mipuite chu tul bik a nih loh chuan pawn-a chhuak lo tur leh chhuak tlem tura zirtir turin Chanchinbu mite chu a ngen a. Loh theihloh a pawn chhuak turte pawhin tha taka Mask hmang tur leh Inchhung leh hnathawhna ah pawh Mask hrenga, midangte nen inhlat-a awm tura thehdarh turin a ngen a ni.

He hunah hian Bawrhsap chuan Veng leh khaw hrang hranga VLTF te pawh COVID Appropriate Behaviours (CAB) khauh taka an huamchhunga kengkawh thar leh tura ngenin, Dan bawhchhiate pawh hrem hreh lova, khauh taka Dan kengkawh thar tur leh nikum lama thahnem an ngaihna thinlung kha pu thar leh turin a ngen a. Police, vantlang hmuna duty zawng zawngte pawh Dan bawhchhiate mana, chawi tir uar zual turin a ngen a, CAB tha taka zawm chu mitin mawhphurhna a nih thu sawiin, “Kan chhungkua, kan thenawm khawveng leh kan khawtlang him nan mitin in himna Dan kan zawm a tul hle a ni,” tiin hrileng dona kawngah kan zavaia kan thawhho a tul thu a sawi a ni.

Nimin-a Bawrhsap in thuthar theh-darhtute a kawmna ah hian Serchhip CMO Dr. Laldawngliana Sailo chuan All Mask Campaign chu a tirah ni 10 chhung kalpui tura tih ni mah se tun thla chhung kalpui tura pawhsei leh a ni tih sawiin, tha taka tun thla chhung mask kan hmang tlang a nih chuan hri inkaichhawnna hi chhu chat thei tura beisei a ni tih a sawi a. Tha taka Mask kan hman hian hri laka himna tura pawimawh dang te pawh kan zawm tha tih sawiin, Covid hri leng mek chu boruak atanga inkaichhawn ni chiahlo mah se a vei ten an thawkchhuah chu boruak ah a awm laia inkaichhawn theih a nih avangin Mask hman ngaih pawimawh a tul thu a sawi bawk.

He hunah hian District Surveillance Officer Dr. Lalngaihawmi Chhangte chuan ni 10 kalta chhungin Serchhip District-a hri kai punna chu zaa 46 vel a ni tih sawiin, Keitum, New Serchhip, Chhing-chhip, Thenzawl leh Khawbel-ah te hri kai hi an pung zual tih a sawi a. Hri kai thar zingah hian kum 18 hnuailam pawh an pun zel thu sawiin, heng hri kai punna khua ah te hian CAB an zawm thalo tlangpui nia sawiin, Covid hri hian min kiansan mai dawn-a a lan loh avangin vantlang hmun chauh ni lo, mahni In-ah te pawh Mask kan hman uar a tul thu a sawi bawk.

He hunah hian Addl. DC Lalmuan-sanga Ralte pawhin mipui ten CAB kan zawm that a tul thu sawiin, kan tih tur kan tih loh avangin hreh tak chunga Containment Zone, Micro-Containment Zone leh Restricted Area puan te pawh a ngai leh ang tih a hlauhawm tih a sawi bawk.

Nimin-a Bawrhsap in thuthar theh-darhtute a kawmna ah hian Bawrhsap hi DDMA-a member ten an tawiawm bawk a ni.

Comments

Popular News (Last 30 Days)

Serchhip DCSO sawn a ni