Latest News

North Vanlaiphai tana tui lak hna thawh mek enfiah

Image
North Vanlaiphai khaw mipui tana tui thiang-hlim in tur lakna tura hnathawh kal lai mek, North Vanlaiphai Water Supply Scheme, Rawleihlawn Pumping chu tunhnai khan North Vanlaiphai Village Council leh North Vanlaiphai Joint YMA hruaitu ten a hmunah kala enfiahin, hna thawh tawh te tha an tih thu an sawi a, hna chak leh tha zawka thawk zel turin an ngen.

MNF Diamond Jubilee lawmna kum khat chhung awh tur neih tan a ni

Mizo National Front (MNF) kum 60 tlinna, Diamond Jubilee lawmna chu nimin khan Aizawl-a Vanapa Hall-ah neih a ni a, he hunah hian MNF President Zoramthanga chuan ‘Ni tha lo atan MNF sawrkar hi ruat a ni’ tih chu a dik tih a sawi.

MNF Diamond Jubilee lawmna ah hian Chief Minister leh MNF President Zoramthanga chuan, “Pathian in he hnam hi chanchintha hril darh turin min duh a, min veng a, min chawimawi a, min hum a ni,” tiin mahni population ratio-ah chuan Missionary tir hnem ber kan ni tih a sawi a. “Chanchintha hril darh turin Pathian in he hnam hi min duh a ni. MNF din hma pawhin he ram luah tur hian chhan neiin Pathian in he ramah hian min dah a ni,” a ti. MNF President chuan, “Pu Laldenga Hnam Pa, kan movement pa kan hre reng a ni,” tiin “Pathian in MNF hi kum 60 chhung a hum tih hi ka sawi duh a ni a. India ramah pawh party ral tawh a tam em em a. Kum 60 chhunga MNF-in a paltlang hi a neu lo hle a, kum 20 ral dovin rambuai a paltlang a. Remna a awm hnua MNF paltlang pawh hi a hautak hle a ni,” a ti a. “Pathian in hun a tihah chuan MNF a hungchhuak a. Chuti chung pawh chuan sawrkar chunga MNF hun tawn tawh leh tawn mekte chu a hautak a ni,” a ti.

Chief Minister chuan, “Ni tha lo atan MNF sawrkar hi ruat a ni, an ti a, a dik khawp mai. Ram kang, ramri buai inkah, Burma refugee, Vawk natna nasa tak leh khawvel chawk buai Covid natna nen kan buai a. He hunah hian Lalpa'n a thusawi ngaithla turin min duh a ni. Hemi hmanga Pathian thusawi tur hi kan ngaithla a ni. Lalpa'n a tawk ta e, tia a tihdam hun a la thleng ang. Zoram chhiatna in a bawh mek hi a tihtawp hun a la awm dawn a ni,” a ti bawk.

He hunah hian MNF Sr. Vice President Tawnluia pawhin Mizo Nationalism behchhana MNF party hi din a ni tih sawiin, “Zoram dinchhuahna tur hian he party hi mipuite pawhin min la ring a, rorelna min pe a ni. Mipuite beiseina ti hlawhchham thiang kan ni lo a ni,” a ti a. “Hnam Martar tam takte Zoram tana an nunna hlantute Vawiin hian kan hre reng a. Martar-te thisen a an bual party hi chuti maia tlu tur a ni lo a ni. Martar chhungte hriatreng leh ngaih pawimawh hi kan tih tur a ni,” a ti bawk.

Nimin-a MNF dincham lawmna hun hi an Party Vice President Vanlalzawma chuan kaihruaiin MNF dintu mi 8-te hnenah chawimawina thuchei (Citation) hlan an ni a, Martar-te zahna leh sunna atan ngawi rengin minute khat din a ni a, Laldenga nupui, Lalbiakdiki’n Jubilee Cake a zai bawk a ni.

MNF Diamond Jubilee lawmna hi kum khat chhung (22.10.2021 atanga 22.10.2022) kawng hrang hranga hmang tura inbuatsaih a ni a, Mizoram hmun hrang hranga MNF Party-te chuan nimin khan a bul tanna hun hi an hmang a ni.

Comments

Popular News (Last 30 Days)