Halpuah leh halmawi khapna ah khauh takin sawrkar in kal a tum tih Home Minister in a sawi

Home Minister Lalchamliana chuan Halpuah leh Halmawi te, Silai lem mu nei chi te khapna chu sawrkarin khauh taka kalpui a tum thu a sawi.

Krismas leh Kumthar vuakvetah boruak hrisel a awm theih na tur te, bengchheng a awm lohna tur leh kangmei chhuak thei te laka kan him tlanna tura inzirtirna nizan hmasa a Aizawl Vanapa Hall-a neih a hmanpuina ah he thu hi sawiin Home Minister chuan Halpuah leh Halmawi te, Silai lem mu nei chi etc,. te chu mipui hriselna atana tha lo leh thil hnawksak tak, thil pawi thlen thei, kan chin dawklak mai mai leh sum tam tak sen ralna ni bawk si a ni tih a sawi a. He thil tha lo tak khapna chu sawrkarin khauh taka kalpui a tum thu sawiin, he hmalakna nikum lama kalpui dan te, dan bawhchhia te hrem an nih dan te leh kumin a khauh zawka khap tum a nih tur thu te a sawi a ni.

Home Minister chuan kumin Oct. 11 khan Krismas leh Kumthar vuakvetah Halpuah leh Halmawi te, Silai lem mu nei chi te, Sky Lantern (Zopa rocket) hal loh nise tih rel a nih tawh thu sawiin, Aizawl District bawrhsap pawhin Order chhuahin Home Department lam pawhin an bawhzui nghal thu a sawi a. Dan bawhchhiate hrem an nih theih nan dan leh thupek kengkawhtute hnenah dan bawhchhia a piang chu tumah thliar hrang lova report thin tur leh mipui zirtirna kawngah YMA chu sawrkarin a rin tawk thu a sawi bawk.

Gate nei Department hrang hrangte chu halpuah leh halmawi rawn phurh luh tum an awm em tih uluk taka lo check thin turin Home Minister chuan ngenin, Dawrkai te pawh heng khap thil te hi zuar lo turin a ngen bawk a, Police te leh YMA lam te pawhin uluk takin an check dawn tih a sawi a. Chutihrualin, check dawn vang pawh ni chuang lovin Sawrkarin mipuite himna atan leh thil tha zawk tur a buaipui a nih avang hian tha taka zawm mai turin mitinte a ngen a. Sawrkar hna thawk lian te leh dawrkai lian te, Contractor leh eizawnna hrang hrang avanga hmelhriat nei tha te pawh phai lama an dawr thin ten thilpek atana rawn pek an tum pawhin lo hnar mai turin a ngen bawk a ni.

Central YMA buatsaih Halpuah, Halmawi, Silai lem, Sky Lantern, etc., khap chungchanga inzirtirna hun hi Central YMA President Vanlalruata chuan kaihruaiin he hunah hian halpuah/halmawi in mihring hriselna a nghawng dan te, kan chhehvel boruak bakah min hualveltu (Environment) a tihchhiat dan te, sum leh pai a nghawng dan te, a khapna leh hremna chungchang bakah he thil thalo laka khawtlang a himna tura YMA mawhphurhna te chipchiar taka inzirtir a ni a. He hunah hian Aizawl khawpui chhung leh a chhehvel atangin YMA Branch hruaitute an tel a ni.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result