Tuikum bialtu MLA in Thentlang khua a tlawh

Tunhnaia COVID-19 hri kai engemaw zat hmuhna Thentlang khua chu nimin khan bialtu MLA leh Assembly Deputy Speaker Er. Lalrinawma chuan tlawhin khawtlang hruaitute nen inkawmna an nei.

Thentlang khua tlawhtu bialtu MLA hian hri kai te enkawlna, 4C a tlawh hnuah VC leh VLTF hruaitute nen YMA Library building-ah inkawmna neiin hri kai te enkawlna kawnga khawtlang tanrualna chu fakawm a tih thu a sawi a. SOP te zawm tha chung zel leh VLTF te remruat ngaichang thiam zel tura mipuite chahin, Hri kai palhte pawh tumah thinhrik lovin, tanrual a tul a ni tih i hrereng turin a chah bawk. Er. Lalrinawma hian tunhnaiah sawrkarin Tuikum bial chhunga Health Sub-Centre thahnem tak Health & Wellness Centre-ah a hlang kai tih sawiin, bialtu MLA anih angin sawrkar chungah lawmthu a sawi bawk.