Latest News

Khaw pahnih hmun khuahkhirh bikah puan an ni

Serchhip District Bawrhsap Kumar Abhishek IAS chuan tunhnaia Serchhip District chhunga COVID-19 hri kai hmuhchhuah tamna Leng khua leh Chekawn khua te chu COVID-19 hri darh zel thei dinhmunah a ding nia a lan avangin hmun khuahkhirh bik (Restricted Area) atan a puang a. Chekawn khua ah hian tunhnaiah hri kai mi 20 lai hmuhchhuah ni tawhin enkawl dam an awm chho tan mek a, Leng khua ah hian hri kai mi 52 hmuh ni tawhin enkawl dam an la awm lova, hri kai te enkawlna atan hian 4C pahnih siam a ni bawk.

Chanchin thar thenkhat :

ZMC hmalakna tur sawiho

Zoram Medical College Governing Council chu ZMC inrelbawlna chungchanga ngaihtuah tur pawimawh te sawihoin nimin khan Chief Minister Zoramthanga hovin CM Conference Hall-ah an thukhawm a. He Meeting-ah hian Medical Council of India atanga Renewal Permission hmu leh tura Post fill-up ngai te chu chhawpchhuakin, heng post hrang hrang, a vaiin 32 te hi fill up turin Governing Council chuan phalna a pe a. Heng bakah hian post pawimawh tak tak Ex-Post Facto approval pek ngai te chu phalna pek a ni bawk. Meeting-ah hian Mizorama damlo inenkawlna tha nei tur chuan Doctor thiamna thuk tak leh anmahni pui tur hmanrua tha a pawimawh thu leh, hemi atan hian ZMC-a zirna quality tha neih a pawimawh thu sawi a ni a. Sawrkar laipui-ah pawh a tul anga hmalak zui zel nise tih a ni.


Cheng nuai 26 chuang dawng

Central YMA chuan tunhnaia Myanmar ram buaina avanga Mizoram-a raltlan te tanpuina atan Sub-Hqrs./Group/Branch YMA-te bakah pawl leh midang atangin Rs. 26,50,198/- zet a dawng tawh a, tanpuina petute chungah lawmthu an sawi a ni. Nimin-a Central YMA hnuaia Myan-mar Refugee Relief Committee thukhawm chuan tanpuina an dawn semchhuah dan tur hi relin, Sub-Hqrs. YMA, Champhai leh Hnahthial-ah cheng nuai 6 ve ve leh thawmhnaw hlan relin Chhim-tuipui Group YMA, Central Young Lai Association leh Sihhmui & Sihphir Neihbawi-ah cheng nuai khat theuh hlan nise an ti bawk.


Raltlan rawn lut pun belh zel

Myanmar ram buaina thleng avanga sa himna zawnga Mizoram-a rawn raltlan chu an la pun belh zel a, nimin thleng khan Lawngtlai District-ah raltlan rawn lut 3022 awm tawhin Lunglei District-ah mi 237 an awm mek a, Hnahthial District-ah pawh mi 2,244 an awm mek a. Ral-tlan rawn lut tamna ber Champhai District-ah pawh nimin thleng khan raltlan rawn lut mi 6400 an awm mek nia thudawn a ni bawk.


MPYCC in sawrkar phut

Congress Thalai, Mizoram Pradesh Youth Congress Committee (MPYCC) chuan Covid hri leng chhuanlamin MNF Sawrkar chuan sum harsatna chhuanlamin mipui harsatna hrang hrang a thlen tir mek tih thuchhuah siamin an tarlang a, India rama State hrang hrang zingah Sawrkar budget atangin Covid hrileng dona atana sum hmang tlem filawr lak kan nih thu tarlangin, Covid hri leng avanga sum harsat chhuanlama Sawrkar hnathawk, pensioner, zirlai leh contractor te sum hren sak tlat chu pechhuak vat tura an phut thu an sawi bawk.

Comments

Chhiar Hlawhte

Book of the Year hlan