Serchhip District Sports Committee in an kuta Sports Stadium dah turin sawrkar an phut

Serchhip District Sports Committee (SDSC) chuan Serchhip Sports Complex-a Stadium chu mumal taka enkawl thuai a nih theih nan SDSC kutah a enkawlna hna leh thuneihna pe tura sawrkar ngenin, October 22, 2021 thlenga chhanna an hmu lo a nih chuan Sports Complex ramchhunga Stadium enkawl hna hi a tul angin hmalaka kalpui an tum thu an sawi.

Tunhnai khan SDSC hian Mizoram sawrkar-a Sports & Youth Services Department Director hnenah lehkha thawnin Serchhip Sports Complex ram chhunga Sports Stadium sak hna chu zawhfel anih hnuah August 30, 2021 khan hawn niin Sports Complex area chhunga Stadium sak hi hawn anih rual khan helai hmun enkawltu, SDSC kuta awm zui mai tura an lo ngaih laiin Sawrkar kalphung pangngai angin UD&PA Department chuan Sports & Youth Services Department kutah a hlan ta tih an sawi a. Sports Department chuan helai hmunhma enkawltu leh humhalhtu SDSC kutah a enkawl hna a hlan chhawng mai tura an lo beisei laiin he Stadium hawn anih atanga thla khat leh a chanve zet a ral hnu pawha a enkawl dan mumal tak siam ala ni lo chu pawi an tih thu an sawi a ni.

SDSC chuan he Stadium hawn anih atanga thla khat zet a liam hnuah pawh SDSC kuta hlanna emaw, a enkawl dan mumal tak siam emaw a awm loh avangin a enkawl zui dan tur chungchang ah hian DSYO Serchhip hnenah rawtna leh ruahmanna te thlenin he Stadium hi mumal taka enkawl leh humhalh thuai tul an tih thu leh amaherawhchu tun thlengin chhanna an la hmu lo tih an sawi a. October 18, 2021-a SDSC Executive Meeting thurel angin Serchhip Sports Complex-a Stadium chu mumal taka enkawl thuai a nih theih nan Serchhip District Sports Committee (SDSC) kutah a enkawl hna leh thuneihna pe tura Sports Department Director chu ngenin, he an ngenna chungchangah hian October 22, 2021 thlenga chhanna leh SDSC kuta hlanna a awm lo anih chuan Sports Complex ramchhunga Stadium enkawl hna hi a tul angin hma laka kalpui mai an tum thu an sawi a, enkawltu mumal leh hman man leh kalphung mumal lova a awm reng chu an ui in an phal tawhlo tih an sawi a ni.

SDSC chuan Serchhip Sports Complex hi kum 1986-ah Serchhip tualchhunga Officer te leh khawtlang hruaitute hmalaknaa bul tan a nih angin khawtlang tangrualin a theih ang anga hma la in, a enkawl leh a ram humhalh hna pawh tualchhung thuneitute (Games & Sports Association, Sports Complex Managing Committee, District Sports Committee) kutah awm chho tih an sawi a. Football Ground laih zawh anih hnuah hun rei tak cheibawl mumal loh anih hnuin Mizoram sawrkar hmalakna in Stadium tha tak siam a nih bakah a chhungah Football Artificial Turf (Phullem) phahin Mizoram sawrkar sum hmanga Athletics Running Track siam pawh lawmawm an tih thu an sawi bawk a ni.