Police Duty te Vote thlak theih loh chungchang Home Secretary leh DGP ten an sawifiah

Mizoram sawrkar-a Home Secretary H. Lalengmawia chuan State pawna Mizoram Police duty-te'n vote an thlak theih loh chhan chu sawrkar inthlahdah vang a nih loh thu a sawi a. Mizoram DGP Anil Shukla pawhin, “Police-te'n vote an thlak theihna atan theihtawp tak meuh meuh kan chhuah,” a ti.

Home Secretary leh DGP te hian nimin khan Aizawl-a Chief Secretary Conference Hall-ah thuthar thehdarhtute kawmin, State pawna Mizoram Police duty mi 1,047-te'n Lok Sabha MP inthlana vote an thlak theih loh chungchang hi an sawifiah a. He hunah hian Home Secretary H. Lalengmawia chuan March 19, 2024 khan Lok Sabha MP inthlan dawn avangin Mizoram Police-te chu Election Commission of India (ECI) thuhnuaia an awmna turin Order an chhuah tih sawiin, “March 20 atang chuan DGP atanga a hniam ber thlengin ECI hnuaiah an awm tawh. June 6 thleng ECI hnuaiah hian an awm dawn,” a ti a. ECI thuneihna hnuaia an awm chhungin State sawrkarin an laka thuneihna a nei lo tih sawiin Home Secretary chuan, “Discipline, transfer etc. ECI thuneihna vek a ni tawh. Sawrkar inthlahdah vanga vote thlak thei lo an ni lo,” a ti a, State sawrkar inthlahdah vanga vote an thlak lo anga sawi awm vanduaithlak a tih thu a sawi bawk.

DGP Anil Shukla pawhin Macrh 16, 2024-ah Lok Sabha inthlan atan notication chhuah a nih thu sawiin, “Mizoram-ah chuan inthlan hun atan April 19 ruat a ni. Ministry of Home Affairs (MHA) chuan Mizoram Police-te hi an duty-na tura tih March 28, 29 leh 30 te pan turin a rawn ti a ni,” a ti a. CEO hnenah Postal Ballot-a vote an thlak theihna atan ngenna siam a nih thu pawh sawiin, “Mah se, Technical issue a awm. Nomination withdraw hun a zawh hma chu Postal Ballot hmangin vote thlak theih a ni lo,” a ti a, MHA order anga tirhchhuah an nih hnuah in withdraw theih hun chhung a tawp chauh thu a sawi bawk.

Police-te'n vote an thlak theihna atan theihtawp an chhuahzui thu sawiin Mizoram DGP chuan, “CEO kaltlangin ECI-te ngenna thlen a ni. CEO lam pawhin kan Police-te'n vote an thlak theihna atan theihtawp an chhuah. Kan theihtawp tak meuh meuh kan chhuah. Kan Police-te'n vote an thlak thei lo hi pawi kan ti takzet a ni,” a ti bawk.

Nimin-a thuthar thehdarhtute an kawmna ah hian Home Secretary leh DGP hi IGP Lalbiakthanga leh Home Joint Secretary Lalthiamsanga Sailo-te'n an tawiawm a ni.

Comments

Popular News (Last 30 Days)

LPG man bithliah thar