HSSLC Exam 2024 Result chhuak ah Serchhip District-a Zirna In te an titha thawkhat

Mizoram Board of School Education (MBSE) chuan kumin-a pawl 12 zirlaite tana Higher Secondary School Leaving Certificate (HSSLC) Exam a buatsaih result chu nimin khan a tichhuak ta a, Serchhip District-a zirna In te pawhin an titha thawkhat niin a lang.
Serchhip District-ah hian Arts-ah zirna In 12 atangin zirlai 435 ten Exam beiin 370 an pass a, za zela 85.06 ten pass in Private Candidate mi pahnih Exam-ah pakhat a pass bawk. Science-ah zirna In pathum atangin zirlai 109 ten Exam beiin 76 an pass a, za zela 69.72 ten pass in Private-a Exam mi pakhat in a pass bawk a. Commerce-ah Zirna In pakhat atangin zirlai 3 ten Exam hmachhawnnin pahnih an pass a, Private-a Exam an awm lo thung a ni.

Serchhip District chhunga Zirna In atangin Mizoram puma a titha zual Top 10-a lang phak kumin hian an awm lo a, Lalhruaizeli D/o Vanlalzawmliana chuan English-ah Mark 100-ah 93 hmuin he Subject-a Mark hmu sang ber zingah a tel a ni.