Ruahsur kaihhnawih a chhiatna CM in tlawhin ralna leh chhawmdawlna a theih anga hlan nghal a ni

Cyclone Remal leh a kentel ruahsur in nizan hmasa zankhua leh nimin thlenga Mizoram a nuai avangin hmun tam takah chhiatna thleng a awm a, tun tuma chhiatna thleng ah hian nunna chan mi 20 chuang awmin leimin in a hnawl mi thenkhat chu chin hriatloh in an la awm bawk a. Vanduaina thlenna hmun te hi nimin khan Chief Minister chuan a tlawh a ni.

Chief Minister hian nimin zing khan Aizawl District Emergency Operation Centre (DC Conference Hall) chu tlawhin Disaster Management & Rehabilitation Minister K. Sapdanga, Chief Secretary Dr. Renu Sharma leh Official pawimawh dangte nen tun tuma ruahsur leh thli thleh kaihhnawiha chhiatna thleng hrang hranga hmalak dan tur an sawihova, District hrang hranga DC te biain chhiatna an tawh dan an zawt a. Chumi hnuah Chief Minister hian he chhiatna tuartute chhawmdawl nan sawrkarin cheng vbc. 15 a ruahman thu leh nunna chan te chu sawrkarin cheng nuai li (4) theuhva a ral tur thu a puang a. Hemi hnu hian chhiatna tuartute tan leh chhanchhuahna hna thawktute zawng zawng tan tawngtaina hun an hmang a, hemi hnu hian sawrkar mi pawimawh dangte nen hian chhiatna lianthlam thlenna hmun te an tlawh nghal bawk a ni.

Chief Minister leh DM&R Minister te hian Melthum huamchhunga leimin in chenna In a hnawl avanga chhiatna thlenna hmun tlawhin helai hmunah hian In 4-a awm mi 20 chuang chu leimin hian a hnawl nia hriat a ni a, nimn tlai thleng khan ruang 14 lakchhuah a ni tawh a, Mizo 5 bakah hnamdang 2/3 zawn mek an la ni bawk a. He vanduaina thlenga nunna chan te ruang Presbyterian Kohhran Hall-a an Postmortem-na hmun hi tlawhin ruang lakchhuah tawh mi 12 te chu puanin an tuam a, helai hmun an tlawh laia ruang lakchhuah tawh zinga Mizo pariat te chu Minister K. Sapdanga hian sawrkar ralna (ex gratia), a hmahruai atan Rs. 200,000 theuh a hlan a. Mitthi te aiawh hian Melthum Local Council Chairman Saihmingliana'n dawngin Sawrkar hian mitthi te hi Rs. 400,000 theuhvin a ral dawn a, tuna an pek bak a dang hi chu chhiatna report engkim a fel fai hnuah hlan leh tur a ni ang. Non-Mizo thi te erawh hi chu thil tul te tihfel a nih hunah an Bank Account ah thunsak tur a ni anga. Ruang la hmuh loh te pawh lakchhuah an nih veleh ralna hmahruai hi pek nghal mai theihin DM&R Department chuan ruahmanna siamin Chief Minister hian Melthum YMA hruaitute hnenah thingpui lumna tur Rs. 50000 a hlan bawk.

Hlimen-ah pawh tun tum-a ruahsur avanga leimin hian chenna In pahnih a hnawl a, ruang pali lakchhuah ni tawhin Mizo pahnih leh hnamdang mi pahnih an ni a, he thu buatsaih lai hian mi thenkhat chu lemin hnuaiah hian an la awm nia hriat a nih avangin mi tlawmngai ten hma an la mek zel a, heng bakah hian Falkawn-ah mi pahnih an thi nia hriat a ni bawk a, ruang pakhat hmuh tawh a ni. Salem Veng-ah chhungkaw pakhat-a mi pathum thiin an pathum-a ruang hi nimin tlai khan lakchhuah vek a ni bawk.

Melthum-a chhiatna hmunhma a tlawh hnu hian Chief Minister Lalduhoma hian Aizawl Kanan Veng thlanmual panin lemin avanga chhiatna thleng a tlawh nghal a, helai hmuna Thlanmual min seng-hawia hnatlang te thingpui lum nan Rs. 50,000 a hlan leh bawk a. Kanan Veng thlanmual min ah hian thlan 51 vel a chhia niin an sawi a, a theih ang angin official leh mi tlawmngaiten a senghawi hna an thawk mek a ni.

Tun tuma Thlipui leh ruah thawk avang hian chhiatna thleng thei laka mipuite an him theihna turin Mizoram sawrkar chuan nimin kha Zirna In tan chawlha a puan bakah Sawrkar Pisa te khar a ni a. Vawiin lam pawh chawlh ah puang lehin mipui te tana service pawimawh thawktu Disaster Management and Rehabilitation, District Administration, Health and Family Welfare, Mizoram Police, P&E, PGE leh adt a huam lo thung a ni.