Ruah leh thli avanga chhiatna thleng Political Party ten pawi an tih thu an sawi

Mizoram-a Political party hrang hrangte chuan ruah leh thlipui thawk avanga Mizoram-a chhiatna thleng chu pawi an tih thu an sawi.

ZPM President Lalliansawta chuan kumtin thli leh ruahpuiin kan tuar thin tih sawiin, chutih laiin nizan hmasaa thlipui tleh leh ruahsur-in Zoram hmun hrang hrangah leimin nasa tak thlenin chhiatna hrang hrang leh nunna channa hial a thlen chu pawi an tih thu a sawi a, “In leh lo, ranvulh leh nunna hial chan kan awm hi rilru a na hle a, thinlung takin kan tawrhpui a ni. Leimin avangin khawkar kawng hmun hrang hrangah a ping a, veng thenkhat thlanmualte pawh a chim hial tih kan hriatin pawi kan ti hle a ni,” tiin “Khuarel chhiatna kan tawh mek laiin Pa ber chan changa Chief Minister Pu Lalduhoma leh kan Minister leh MLA te chhiatna tawhna hmuna pana a tuartute hnem tura rang taka an che chhuak nghal hi lawmawm kan tiin thlamuan thlak kan ti,” a ti bawk.

Mizoram Pradesh Congress Committee (MPCC) President Lal Thanzara pawhin Cyclone Remal avanga Aizawl leh Zoram hmun hrang hranga nunna chan an awm te leh leimin vanga In leh lo chan te, tuilian avanga chhungkaw tam takin harsatna an tawk te chu MPCC chuan a tuarpui thu leh pawi a tih thu a sawi a. “Heng harsatna tawk leh nunna chan te zawng zawng tan hian Pathian thlamuanna leh Pathian awmpuina kan dilpuiin kan tawngtaipui a ni,” a ti bawk.

BJP Mizoram chuan Bay of Bengal tuipui atanga Cyclone siper vanga Mizoram hmun hrang hranga chhiatna thleng chu pawi an tih thu thuchhuah siama tarlangin, “Nunna hlu tak chan te leh chenna In chan tam tak an awm chu pawi kan ti takzet a, khuarel chhiatna avanga harsatna hrang hrang tuar te chu kan tawrhpui takzet zet a ni,” an ti a. Melthum-a chiatna thlenna hmun chu nimin khan BJP State President Vanlalhmuaka chuan tlawhin chhiat tawhna hmuna hnatlang ten a tul anga an hman turin pawisa fai leh Silpoulin Bundle khat chu Central YMA President Lalhmachhuana hnenah an hlan a, chhiat tawk te hi a tawrhpui takzet thu sawiin, Khuarel chhiatna kan tawh chang leh haraatna kan tawh changa Mizo tlawmngaihna ropui tak lang thin chu a lawmawmin a chhuanawm awm a tih thu a sawi bawk.