Manifesto anga awm lo ah puh

MNF General Secretary Lalremruata Chhangte chuan kan sawrkar hrawn mek ZPM chu Manifesto-a an insawi anga an awm loh thu a sawi.

Nimin a Mizo Hnam Run, Aizawl-a Chhung Inkhawm neih ah Lalremruata Chhangte chuan ZPM party chuan sawrkarna an chan chuan Mizoram Development Bank an din dawn thu leh chumi kaltlang chuan thalaite hnenah Loan pung awm lo chi an pek dawn thu te, sawrkar chu a thlawna Guarantor-ah a tan dawn thu nasa takin an tlangau pui thu a sawi a. Sawrkarna fawng an vawn hnuah erawh chuan, ‘Mizoram Ceiling on Government Guarantees Act’ kan lo neih avangin Loan pung awm lo a pek leh a thlawna sawrkar guarantor-a tan chu tihhlawhtlin mai theih a ni lo, tiin Mizoram mipui leh thalaite an bum leh mek nia sawiin, hei hi mipui zahlohna lian tak a nih thu leh an in sawi ang hian awmse a duh thu a sawi bawk. Hei bakah hian Sawrkar in sum a puk lo ang tia an sawi te, CM in portfolio engmah achelh lo ang tih te, Electric bill leh bill dang te tisang lu tura an insawi te chu a takah chuan a ni leh si lo nia sawiin, “In renchem tlangau pui dum dum siin, CM Adviser pawh 5 ngawt ruatin,  anmahni puibawmtute thla bi hlawh ringawt pawh thla khatah cheng nuai 15 chuang niin, kum 5 chhung chuan cheng nuai 1000 dawn senral a ni dawn a ni,” a ti bawk.