Serchhip District-ah kumin a Green Mizoram Day hman dan tur ruahmanna siam a ni

Green Mizoram Day 2024 chu June 11, 2024 khian Serchhip District-ah pawh hman a ni leh dawn a, he hunah hian kumin Thal laia kangmei venna kawnga hma la tha khua te hnenah chawimawina hlan leh tur a ni ang.
Nimin khan Serchhip-ah District Level Committee on Green Mizoram chu an Chairman leh District Bawrhsap David Lalthantluanga hovin a Pisa-ah an thu-khawm a, he hunah hian Bawrhsap chuan Green Mizoram Day chu Mizoram-ah kum 1998 atang khan kumtin hman thin a ni tih sawiin, he ni denchhen hian Environment humhalh a tul zia leh mihringte dam khawchhuahna tura thing leh mau ti chereu lova a phun belhtu nih a pawimawh zia inzirtirna neia hun hman thin a nih thu a sawi a. Thingtiak phunte a puitlin ngei theih nan enkawl zui a pawimawh dan te a sawi bawk a ni.

He Meeting hian State Level Sub-Committee on Green Mizoram in ruahmanna an siam angin kumin June 11 khian Green Mizoram Day hi Serchhip District-ah pawh hman leh nise an ti a, Serchhip DC Conference Hall-ah chawhma dar 11:00-ah hun hmangin District Bawrhsap chu khuallian a ni anga, he hunah hian environment humhalhna lam hawi thupui hmanga presentation nei turin Govt. Serchhip College atangin mithiam sawm ni se, programme chhim turin sawrkar hnathawkte leh tlawmngai pawl te bakah zirlaite sawm ni se an ti bawk.

Kumin-a Green Mizoram Day-ah hian thupui atan ‘I nunna atan thing phun rawh’ tih chu thlan a ni a, Green Mizoram Day 2024 puala inkhawmah hian District Level Award for Fire Prevention chu kangmei venna kawnga thawk tha Village Council te hnenah sem leh tura ruahman a ni bawk a. He hun hman a nih hnu hian a huho-a thingtiak phunna hun hman leh tur niin kumin hian Kikawn leh Chhiatlang inkar kawngpui dunga Road Reserve Area chu thingtiak phunna atan thlan a ni a. Thingtiak chi hrang hrang -Tlaizawng, Chawnpui, April par leh a dangte phun tum a ni.

He hunah hian District Level Committee on Green Mizoram-a Member Secretary leh Thenzawl DFO R. Lalnungrenga chuan nikum lama Green Mizoram Day hman a nih dan tlangpui tarlangin, nikum-a Green Mizoram Day-ah khan Khawtetlang-a thingtiak phunna hmun tura an thlan ah thingtiak 427 phun a nih thu leh za zela 85 vel damchhuak anga ngaih a nih thu a sawi a. Heng bakah hian Pawl hrang hrang, sawrkar Office leh Zirna In tan thingtiak 2301 sem a nih thu a sawi bawk. Kumin a Green Mizoram Day denchhena pawl hrang hrang leh mimal thingtiak phun duh te tan dilna hi Forest Department hotute hnenah thehluh theih a ni bawk ang.