MZP in Zirlai tithate chawimawina hun buatsaih

Mizo Zirlai Pawl (MZP) General Hqrs. chuan High School Leaving Certificate (HSLC) Examination 2024-a Top 10-a Mizo tlingte chawimawina hun nimin khan Aizawl Vanapa Hall-ah an buatsaih a, Minister Prof. Lalnilawma chuan he hun hi khuallian niin a hmanpui a ni.

Nimin-a he hun hmanna ah hian Minister Prof. Lalnilawma chuan HSLC Top-10 a tling Mizo zirlaite chu lawmpuina leh duhsakna hlanin, an bul tanna a nih avangin an hmabak a la tam thu leh hlawhtling zel tura theihtawp chhuah turin a fuih a. Khawvel hun an hman chhoh zelna turah hlawhtlinna chauh ni lo, hlawhchhanna te pawh zir a ngai tih sawiin, Zirlai hlawhtling rihlo te pawh beidawng lo turin a fuih a. “Kan thiamna leh finna te, kan hlawhtlinna te hi mahni tan chauh ni lo, kan ram leh hnam leh khawtlang tan i hmang ang u. Kan zir zelna kawng ah khawi hmunah pawh awm ila, Mizo identity– tlawmngaihna leh huaisenna, midang tana inpekna i vawng nung zel ang u,” a ti bawk.

MZP General Hqrs. Vice President Lal-remruata kaihhruai he hunah hian MZP President H. Lalthianghlima chuan kumin HSLC Exam Result-ah hian 70% aia tam an passed thu leh hei aia sang pass theih a ni tih sawiin, tan la turin zirlaite a fuih a. “MZP chuan Mizo zirlaite inkarah inelna thianghlim awm se, tang deuh deuh ila. Hnamdang zirlaite el phak ila kan duh avangin hetiang hun hi buatsaih thin kan ni,” a ti a. Mizo hmeichhia chhuan-awm tak tak an awm rualin, Mizo hnam ti mualpho an awm leh zeuh thin chu pawi a tih thu sawiin, “Sairang thlengin Rel a lo luh dawn avangin, Mizo thalaite eng hna pawh thawk thei turin kan lo inbuatsaih a ngai a ni,” a ti bawk. 

MZP in HSLC Exam 2024-a Mizo zirlai tithate chawimawina hun an buatsaih ah hian Top 10-a tling mipa 5 leh Hmeichhia 8 te hnenah chawimawina thuziak leh Rs. 5000/- theuh hlan an ni a, hei bakah hian Lehkhabu tha tak tak an hlan tel bawk a ni.