Tui Pump kawnga harsatna PHE hotu ten an sawifiah

PHE Minister Prof. Lalnilawma chuan tunhnaia ruahsur nasa leh thli tleh vanga Tui Pump leh sem kawnga harsatna an tawh hrang hrangte nimin khan MJA hruaitute a hrilhfiah.

PHE Department hotute chuan nimin khan an Department Minister ho hian a Pisa-ah MJA hruaitute hi kawmin harsatna hrang hrang an tawh dan an hrilhfiah a. PHE Minister, Prof. Lalnilawma chuan, tunhnai-a ruahsur nasa vanga tuilian khan Aizawl khawpui chawmtu tui lakna, Greater Aizawl Water Supply Scheme Phase-I khawl thenkhat chu tuiin a chim a, niminpiah chawhnu lam khan harsatna an tawh dan hi enfiahin, a hmunah a tlawh nghal tih a sawi a. An rin phak bakin tuilian hian hasratna a thlen a, tui a kam deuh hnuah pawh chirh leh bawlhhlawhin a tihbuai nasat avangin a thnefai chhung ringawt pawh a rei dawn a, mumal tak-a tui an sem leh theih nan thla tel pawh hun an mamawh mai thei tih a sawi a ni. Prof. Lalnilawma chuan, Tui pump-na khawl hrang hrang chu a chhiat leh chhiat loh enfiah a ngai dawn a, khawl hi a chhia a nih phei chuan sum tam tak senga siamthat a ngaih dawn avangin nizan hmasa khan Chief Minister, Lalduhoma hnenah thil awm dan a thlen nghal a. Sum pawh an mamawh mual mai thei tih a hrilh tih a sawi.

PHE hotute sawi danin tuilian hian Phase-I Pump House a chim vek a, chhinchhiah chinah kum 2017 tuilian kha tui chim chin san ber tum niin kha ai khan niminpiah-a tuilian khan metre 1.5-in a sang zawk a. Lui atanga tui pump chhuahna, Raw Water Pump House mai ni lovin, a thlitfimna, Clear Water Pump House thlengin tuilian hian a chim a, hei hian eng angin nge khawl a tihbuai dawn hriat a nih loh thu leh khawl ro hnuah thil awmdan an hriatchian theih chauh tur thu an sawi.

PHE Department hotute chuan, tuilian hian Phase-II chu chim ve lo mah se, kawlphetha pekna line a chhiat avangin tui pump theih a ni chuang lo tih an sawi a, Phase-II bika hman tur hi Diesel Generator Set thar an neih sa hmanga tui Pump dan ngaihtuah mek niin, nizan atang khan tui pump tan theih an tum a, hei hi a hlawhtling a nih pawhin ni khat ah tui litre mtd. 8 vel bak pump theih a nih dawn loh avangin harsatna a sukiang pha dawn lo tih an sawi.

Ni khata tui litre mtd. 37 pum theihna tura ruahman, Greater Aizawl Water Supply Scheme Phase-III pawh tuilian hian a chim avangin tui pump theih a ni rih lo tih PHE hotute chuan an sawi a, tuilianin khawl a tihbuai bakah hian tui a nu nasa a, tui nut zawng tehna NTU 5 chu mihring in tlaka ngaih a nih laiin, niminpiah tuilen laia a nut zawng chu NTU 900 chunglam a nih avangin a thlitfim ringawt pawh buaipui tham a nih thu an sawi a. Aizawl bakah hian Saitual, Lawngtlai, Hnahthial leh Serchhip khaw chawmna tura tui lakna ah harsatna an tawh thu an sawi a ni.