Leimin vangin Serchhip District-ah chhiatna thleng

Niminpiah atanga nimin thlenga ruahsur leh thlipui tleh avangin Serchhip-ah chhiatna thleng a awm nual a, vanneihthlak takin mihring nunna khawih pawi khawp chhiatna thleng erawh a awm lo thung a ni.
Thudawn danin tun tuma ruahsur nasa avng hian Serchhip AOC Veng-a kawng-thlang lama leivung dawlna pakhat chu chimin a thlanglam-a Serchhip Hmar Veng atanga Leisang Veng panna kawng chu a hnawh a, hei vang hian chhungkaw paruk te chu hmun him lamah an in saseng a, Serchhip Leisang kawi bula In pakhat chu a chhaklam lei tawlh avangin dinhmun him lo ah a awm phah bawk a ni. Heng bakah hian Serchhip P&E Veng atanga IOC Veng panna kawng chu lemin in a hnawh a, Serchhip Hmar Veng Sports Complex panna kawng pawh leimin hian a hnawh bawk a. New Serchhip North VC huamchhungah chhungkaw panga te chuan leimin avangin harsatna an tawk bawk.

Chhiahtlang South VC huamchhungah leimin avangin chenna In 10 te chuan harsatna tawkin Chhingchhip khua ah chhungkaw 31 te chenna In pawh leimin avangin dinhmun hlauh-thawnawm ah a awm bawk a. Baktawng Chan In-a C. Vanlalhruaia te In chu leimin in a hnawl a, East Lungdar khua ah chenna In pahnih chu thingzar tliak avangin a chhe bawk a, Keitum khua ah leimin avangin chenna In pali dinhmun hlauhthawnawm ah awmin Rullam khuaa VL. Lawmkima In chu lemin avangin a chhe bawk a. Hmawngkawn khuaa chhungkaw pali te chu lemin avangin dinhmun hlauhthawnawm ah an awm bawk a ni.

Heng leimin avanga chhiatna thleng ah te hian a theih anga chhawmdawlna hna thawh nghal niin DC Office atangin Silpouline pawh an mamawh anga pekchhuah nghal zel a ni bawk a. Heng bakah hian inkalpawhna kawng chhia te hi PWD bakah Vengchhung-a mi tlawmngai ten a theih angin an thianfai nghal bawk a ni.