Zuk leh Hmuam leh Naupangte

Vawin May 31, 2024 hi ‘World No Tobacco Day’ a ni a, he ni hi Kumtin in khawvel pumah thupui neiin zuk leh hmuam, vaihlo that loh zia inzirtirna ni atan a hman thin a ni. World Health Organization (WHO) chuan World No Tobacco Day 2024 thupui atan, ‘Protecting Children from Tobacco Industry Interference’ tih a rawn thlang a. A Mizo tawng chuan ‘Vaihhlo siamchhuaktu te lak a naupang te venhim’ tih te pawh in a dah theih awm e. Vaihlo zuk leh hmuam that loh zia hre thar tura thangtharte zingah zirtirna uar lehzual a pe turin hma kan lak a pawimawh em em a ni. 

Mizote hian vaihlo zuk leh hmuam kan ti/hmang nasa hle a. Global Adult Tobacco Survey 2015-2016 a neih in a tarlan dan chuan India ramah vaihlo hmang nasa ber pahnihna kan ni mek a ni. Hemi piah lamah Global Youth Tobacco Survey 2019 a zirlai naupang kum 13-15 inkar a survey neih in a a tarlan dan in India ramah zuk leh hmuam hmang nasa ber (64% Boys & 53% Girls) kan ni mek bawk a ni.

Mithiamte chuan zuk leh hmuam vaihlo hi ‘Ruihhlo hman tanna kailawn’ tiin an sawi hial a, kan fate Ruihhlo laka an fihlim chhoh theih nan zuk leh hmuam hmang lo tur a kan kaihhruai thiam hi a pawimawh takzet a ni. Thalai naupang zawkte hian vaihlo hlauhawmzia an hriat hma a addict ngheh tir hman tumin Tobacco company te hian tactic chi hrang hrang an hmang thin a, chuvangin thalai leh naupang te hnenah uar lehzuala zirtirna kan pek hi a pawimawh em em a ni.

Vaihhlo industry ten naupangte hip an tum mek lai hian Sawrkar laipui chuan ‘The Cigarettes and other Tobacco Products (Prohibition of advertisement and Regulation of Trade & Commerce, production, Supply and Distribution) Act, 2003’ (COTPA) a siam a, he dan hnuaiah hian Vaihlo leh a kaihhnawih reng reng kum 18 tlinglo te hnena zawrh/hralh a khap tlat a ni. COTPA dan hian Zirna In compound atanga Feet 300 bial huam chhung a zawrh leh chhawpchhuah a khap tlat a ni.

Vaihlo industry te hian vaihlo hmang mek tute hi vaihlo kaihhnawih natna hrang hrang avangin an boral mek zel a ni tih hria in, thangthar ten an hman thar zel theih nan an thil siamchhuah te a itawm thei tur berin an siamin an cheimawi thin a, kan ram hmachhuan kan tu leh fate hi an hma lam hunah an lo hrisel zawk theih nan, zuk leh hmuam lak a venhim hi puitling zawk nu leh pa te mawhphurhna a ni tih hria in midang kut a dah mai lovin zirtirna kan pek fo hi a tul tak zet a ni.

-Serchhip District Tobacco Control Cell

Comments

Popular News (Last 30 Days)

Vawiin-ah HSSLC Exam result

LPG man bithliah thar