'Save the Riparian' huaihawt luikawr dung thenfai hnatlang ah Chief Minister a thawkchhuak

Chief Minister Lalduhoma chuan 'Save the Riparian' huaihawt luikawr dung thenfai hnatlang neih mek, Mega River Cleaning Programme nimin-a Tuikual lui-a neih chu a telpui a, Sports Minister Lalnghinglova Hmar pawhin he hnatlang hi a telpui bawk a ni.

Nimin-a hnatlang neihna hmunah hian Chief Minister chuan 'Save the Riparian' te hmalakna chuan mipuiah zirtirna tha tak a pe tih sawiin, thianghlimna leh bawlhlawh paih kawngah mipui an thangharh nasa tih a sawi a, sawrkar pawh a kai harh tih sawiin, Plastic hman tawh loh paih thin te sawngbawla siam danglamna arang thei ang bera function tir chu sawrkar in a tum thu a sawi a, Aizawl khawpuiin Tuirial-a bawhlawh an paihna pawh a ngaihna awm tawh lo tih sawiin, Hualngohmun-ah sawrkar hmasa atanga hna lo tan tawh pawh hman thuai a nih theihna turin sawrkar hma a la mek tih a sawi bawk.

Chief Minister chuan, Tlawng lui-ah hian zan-ah Len a deng fo thin tih sawiin, “A bawlhhlawh zia hi ka hmu a, Chengkawl rawng thleng hian a danglam phah ni te in ka hria. Hei vang hian Tlawng leh a fintu luite hi thenfai tha ka tihna a rei tawh hle. Rilru in a vei reng laiin tlawmngai pawl 'Save the Riparian' in rawn lang thut mai a. In hnathawh video te kan lo thlir a. Sawrkar pawh min beng harh a, mimal tak pawhin min tiphur a, Vawiin-ah ka rawn tel ve ta a ni,” a ti. “Engmah phut nei lova thalai tam tak in hnatlang thin hi hmuhnawm ka ti a, ka chhuang hle che u a ni. In hmalakna hian mipuite min tiharh zel se, bawlhhlawh a hmunah chauh paih tawh thin ila ka duh hle a ni,” tiin Plastic bawlhhlawh sawngbawlna sawrkarin a siam mek chungchang a sawi bawk.

Sports Minister Lalnghinglova Hmar pawhin Save the Riparian te hnathawh chu a chhuanawm tih sawiin, “Mizoram hi a takin an hmangaih a ni tih kan hmu a ni. Mipuite pawh harh thar ila, faina hi nghet takin i nunpui ang u,” a ti a. “He hnatlang min rawn vailiam tur hian Chief Minister hi kan sawm a, mahse ani hian ‘hnatlang vailiam ringawt tur chuan ka lo kal lovang, ka hnatlang ve ngei dawn a ni,’ tiin min chhang a, Vawiin-ah a rawn tihlawhtling hi kan lawm hle a ni,” a ti bawk.

Nimin-a hnatlang chhunzawm hi Save the Riparian leh NSS Cell, Sports & Youth Services Department ten an huaihawt niin Zirna In 10 atangin NSS volunteer mi 500 vel an thawk a, Save the Riparian te hian an hmalakna thawhkhatna ah Model Veng leh Mission Vengthlang inrina lui, Sakhisih chu ni 20 chhung an lo thian tawh a. A thawh hnihna hi Tuikual lui hnarah tan lehin nimin kha a ni 13-na a ni a. Ni 30 chhung an theih chen thenfai an tum dawn a. Chief Minister hian Save the Riparian te hi hnatlang senso ah cheng nuai hnih a lo pe tawh a ni.