Ni 2 chhung Vawk thi awm lo

Serchhip District chhunga African Swine Fever (ASF) hri lenna khaw pahnih ah nimin khan Vawk thi chhinchhiah thar awm lovin niminpiah ah Vawk thi hi chhinchhiah thar a awm loh bawk avangin ni hnih (2) chhung ASF vanga Vawk thi an awm lo ta a. Hetihlai hian Chhingchhip-ah nimin khan Vawk 7 suat niin Khumtung khua ah Vawk 8 suat a ni leh bawk a ni.
Heti hian nimin thleng khan Chhingchhip khua ah ASF vanga Vawk thi 17 awmin Vawk 140 suat a ni tawh a, Khumtung khua ah ASF vanga Vawk thi 51 awmin Vawk 101 suat a ni tawh bawk a. Serchhip District-a khaw pahnih ah hian kumin chhungin ASF vanga Vawk thi 68 awm tawhin Vawk 241 suat a ni tawh bawk a ni.

AH&Vety Department chhinchhiahna atanga a lan danin Mizoram pumah nimin khan ASF vanga Vawk thi 46 awm lehin Vawk 38 suat a ni leh bawk a, heti hian kumin chhungin ASF avanga Mizoram-a Vawk thi chu 916 a tling ta a, Vawk 1304 suat a ni tawh bawk a ni. Nimin thleng khan Mizoram-a khua leh Veng 54 te chu ASF hri lenna ah puan a ni tawh a ni.