Mizoram-ah Vawk leh Vawksa lakluh khap a ni

Vawk hri leng African Swine Fever (ASF) avangin Mizoram-ah thu leh awm hma chuan Vawk, Vawksa leh Vawksa atanga siam thil eng pawh ramchhunga State dang leh ramdang atanga lakluh khap a ni.

Hemi chungchanga sawrkar thuchhuah tarlan danin kumin March thla khan kum 2022-ah pawh lo leng tawh African Swine Fever (ASF) chu Mizoram-ah leng lehin, Vawk tam tak chan leh a ni a. He hri hi ranvulhtute tana channa nasa tak thlen thei a nih avangin hri darh zel thei laka invenna tura inkaih-hruaina tha tak a awm ngei a tul a hriat a ni a. Hei vang hian Mizoram Chief Secretary leh State Executive Committee, Mizoram State Disaster Management Authority Chairman Dr. Renu Sharma IAS chuan Disaster Management Act, 2006, Section 24(1) in thuneihna a pek angin thu leh awm hma zawng Mizoram-a Vawk, Vawksa leh Vawksa atanga siam thil eng pawh ramchhunga State dang leh ram dang atang pawha lakluh a khap a. AH&Vety Department, Mizoram chu Vawk vulhna hmunhma reng rengte vawnfai kawngah hma la tura tih niin natna kai nia rinhlelh Vawkte chu dahhran theihna turin hma an la tur a ni a. 'National Action Plan for Control, Containment and Eradication of African Swine Fever' in inkaihhruaina a siam ang ngeiin, Vawk thite chu tihral a nih theih nan hma an la dawn bawk a ni. Hei bakah hian natna vang ni thei awm a Vawk thite chu Department Helpline Number 1962-ah emaw, Ph. No. 9366984867/9436142908/9436140179-ah te hriattir zel tur a nih thu pawh tarlan a ni bawk.