ASF dinhmun thlirho a ni

Vawk hri, African Swine Fever (ASF) leng meka Mizoram dinhmun thlirletna leh hmalakna tur sawihona chu nimin khan AH&Vety Minister C. Lalsawivunga hovin a Pisa-ah neih a ni.

He thutkhawm ah hian AH & Vety Minister chuan ASF vanga Vawk vulhtu ten harsatna an tawh nasat zia hriain a tawrhpui takzet thu a sawi a. ASF dona kawngah mipui ten Department leh khawtlang hruaitute hmalakna tawiawm zel turin a ngen bawk.

AH & Vety Department chuan Vawk damlo leh thi te ASF an nih leh nih loh finfiah nghal turin Department Laboratory atanga nemngheh (confirmed) mai theih a ni lo tih he thutkhawm ah hian sawiin, ASF chu Scheduled Disease zinga mi a nih avangin Central Guideline angin confirm tur chuan NIHSAD, Bhopal emaw, NERDDL, Guwahati-ah emaw thawn tur a ni tih an sawi a. Hei vang hian Test result chungchangah hmalak zung zung theih a ni lo tih sawiin, mipuite hriatthiamna an ngen nghal bawk a ni.

Ramdang atanga frozen vawksa lakluh chungchang pawh he hunah hian sawiho a ni a, tun dinhmunah State pawn atanga Frozen vawksa te Department hriatpuia lakluh a awm loh thu tarlan a ni bawk.

He huna tarlan anih danin ASF hri leng vawi thumna nikum May leh December chhung khan Vawk 1039 thiin Vawk 928 suat a ni a. Kumin January atanga nimin thleng khan Champhai, Aizawl, Saitual, Khawzawl, Lunglei leh Serchhip District-ah te Vawk 835 thi tawhin 1086 suat a ni tawh bawk. Tun dinhmunah Vawk damlo te enkawlna damdawi mumal a awm loh avangin Department chuan Vawk vulhtute hriat tur leh zawm tur te an chhuah thin a. Local Council leh Village Council te hriatpuiin Vawk thi leh suat tur chungchangah Department hotute nen inbepawp in hmalak thin a ni tih tarlan a ni bawk.