Bangladesh atanga raltlan CADC Area-ah dah dawn

Adviser to Chief Minister leh MLA Lalmuanpuia Punte chuan Bangladesh atanga raltlan rawn kal te chu Chakma Autonomous District Council (CADC) area-a dah vek tawh tur a nih thu a sawi.

Zo Re-Unification Organisation (ZORO) dinchamphaphak vawi 36-na lawmna hun nimin a ZORO Pisapui, Aizawl-a neih ah Lalmuanpuia Punte MLA chuan Sawrkarin kan unau Bangladesh atanga rawn kal thar apiangte chu Chakma Autonomous District Council (CADC) area a dah vek tawh turin a tih tih sawiin, “Hei hi hmalak mek zel a ni,” a ti a. ZORO in Independence an sual ngai lo tih sawiin, “Khawvel hmun hrang hrang India, Bangladesh leh Myanmar a awm Zofate kan insuihkhawm a, rorelna pakhat hnuaia kan awm theih nan hma a la mai zawk a ni. UNO hian Indigenous People te hi a theihnghilh dawn lova, UNO hi a duhna ah chuan a chak lutuk, a hunah chuan Indigenous people te hi min la khai-chhuak ngei ngei dawn a ni,” a ti bawk.