Thli leh ruah avanga Serchhip District-a chhiatna thleng Bawrhsap hovin sawiho a ni
He sawihona Serchhip DC Meeting Hall-a neih ah hian District Bawrhsap David Lalthantluanga chuan Serchhip District chhungah Cyclone-in a tihchhiat chenna In, sumdawnna hmun, lo leh huan thenkhat a awm thu sawiin, leimin in a hnawh kawngpui thenfai ngai hmun tam takah a awm a; chutihmek laiin chhiatna liantham, thihna leh hliam tuar te awm lova Serchhip District in Cyclone Remal a tuarchhuak thei chu lawmawm a tih thu a sawi a. Heng harsatna hrang hrangte hi thleng mahse Essential Services khawihtu Department hrang hrang te, tlawmngai pawl te leh mipui mimir ten theihtawp chhuahin tan an la a, leimin leh thildang te rang taka thenfai a ni tih a sawi a. Tlawmngaia thawkchhuak mimal tin te hnenah lawmthu sawiin, nunphung pangngai a kan let leh thuai theih nan Department hrang hrangte hmalakna thlawp tlat turin Serchhip District mipuite chu Bawrhsap hian a sawm a ni.
Serchhip District hi Zone 9-ah then niin Zonal Officer ten an vil a. Cyclone Remal-in a tihchhiat report te lakkhawm mek niin May ni 28, 2024 zan atangin report tum 48 dawn a ni tawh a. Serchhip District pumpuiah report dawn chinah In chhia 14 awmin, heng zinga 7 hi luahzui tlak loha chhia (fully damaged) an ni a. Sawrkar inkaihhruaina zulzuiin Zonal Officer te hian tanpuina an pechhuak mek zel a ni.
Serchhip khawpui chhungah inkalpawhna kawng leimin a hnawh te thenfai mek a ni a. Khawlailung atanga Biate panna kawng leimin in a hnawhpin chu lirthei zawh theih tura thenfai a ni tawh a. Hmuntha atanga Khawbel panna kawng PCC Road bal chu a chhak laia motor kal theih tura siam tum a ni a. Hmuntha kawng block pawh thianfai tura ruahmanna siam mek a ni. Khumtung atanga Muallungthu panna hmun engemawzat ah a ping a, Chhiahtlang atanga Lamchhip panna kawng erawh a kaltlang theih a ni. NHIDCL leh PWD te hian an chanpual kawng theuh te an thianfaiin an thawm tha mek a, ni hnih chhungin lirthei kaltlang theih tura peihfel vek theih an inbeisei a ni.
Power supply chungchangah Serchhip District chawmtu Zuangtui-Bukpui 132kV line leh Lunglei via Melriat 132 kV Line a chhia a. Hei vang hian Khawzawl via Saitual line, East Lungdar Sub-Station atangin power lakluh mek a ni a. Zuangtui line hi nimin-ah siamthat hman beisei niin Serchhip khawchhungah LT line hmun 8-ah thing tlu in a vawchhia a, 11kV Chhiahtlang leh PHE Feeder te pek theih a ni lo a, 33kV Chhing-chhip Feeder la pek theih a nih loh avangin Chhingchhip S/S in a chawm Chhingchhip khua leh a chhehvel bakah Thingsulthliah tlangdung ten power an dawng thei lo bawk a.132kV E. Lungdar S/S atangin 33kV N. Vanlaiphai leh Khawlailung te la pek theih loh a ni a, buaipui mek a ni a. East. Lungdar khawchhungah DT pakhat tih loh chu pek vek a ni a, Leng Feeder 11kV erawh pek theih loh a ni a, Vawiin lam hian Eng hi in pek kim theih beisei a ni.
Serchhip mipui chawmtu Tui semna Transmission line leh IOC Booster Pump te chu thli leh ruah thawk hian a tichhia a. Mipui ten harsatna an tawh lohna turin PHE Department chuan siamthat hna an thawk mek a, kal-phung pangngaia kal leh thei turin chawlhkar hnih vel an mamawh dawn tih an sawi a. Hetih chhung hian mipuiin tui an nghei lo nan ruahmanna siam ni bawk mahse tui renchem a ngaih thu leh ruahtui khawl (rain water harvesting) uar a tul thu tarlan a ni bawk.
Comments
Post a Comment