International Day for Biological Diversity pualin Biodiversity humhalh a tul zia inzirtir a ni

International Day for Biological Diversity 2024 chu nimin May 22, 2024 khan hman a ni a, Mizoram-ah pawh Forest Training School, Bethlehem Vengthlang-ah State Biodiversity Board buatsaihin he ni pual hian hun hman niin kumin hian ‘Ruahmanna ah tel ve ta che’ (Be Part of the Plan) tih chu thupui atan hman a ni.

International Day for Biological Diversity 2024 puala hun hman hi Principal Chief Conservator of Forests AK. Biswal chuan hmanpuiin Biodiversity humhalhna lama mipuite fuihna thuchah sawiin, tu leh fate tana chenna tlak ram siam turin mi tinin mawhphurhna kan neih thu a sawi a. Keimahni, a ram neitute leh a chhunga chengten Biodiversity humhalhna lama kan tih tur leh mawhphurhnate tarlangin, hemi kawngah hian mipuite nasa zawka tan la turin a sawm a, Danin a phut angin kan chanvo leh mawhphurhnate hlenchhuak thei theuh turin kan tanrual a pawimawh thu leh kan tih tur te kan hlenchhuah theih nan leh hmasawnna rahbi thar kan kai theih nan he ni kan hman hian rah tha chhuah se a duh thu a sawi bawk.

International Day for Biological Diversity 2024 puala hun hman hi Dampa Tiger Reserve-a Field Director Agni Mitra IFS chuan kaihruaiin Lalramthanga IFS, PCCF (HoFF) Rtd. in Mizoram a Biodiversity Conservation lama kan mamawh thil pawimawh tak tak te tarlangin kalkhawm te zirtirna a pe a. Dr. B Malsawmkima, Scientific Officer, Mizoram State Biodiversity Board in Mizoram SBB hmalakna hrang hrang a sawi bakah Biodiversity Management Committee (BMC) atangin Lalrinawma, Sihphir leh Lalzawnpuia, N. Lungleng ten BMC pawimawhna leh an hmalakna hrang hrang bakah hmachhawp leh harsatna awm te an sawi bawk.

Thilnung chi tinrengte humhalh a venhim an nih theihna turin United Nations Convention on Biological Diversity (CBD) chu kum 1992 khan Brazil khawpui Rio de Janeiro-a Earth Summit-ah din a ni a. He Convention pawimawh taka tel ho zingah hian India ram pawh telin Agreement ziaktu ram 196 zingah a tel ve bawk a. Hemi denchhen hian May 22 hi 'International Day for Biological Diversity' atan United Nations chuan a lo puang a, kumtin thupui thlan bik neiin he ni pual hian hun hman thin a ni a, he ni pual hian May 10, 2024-ah khan Essay Writing Competition buatsaih ni tawhin nimin khan lawmman semna neih nghal a ni bawk.