Kuhva tawlhruk chângin Bilkhawthlir la duty zel

Myanmar atanga dan lova kuhva tawlh a nih loh nan Bilkhawthlir Kuhva Chingtu Co-Operative Society Ltd. chuan duty an la kalpui reng a. Khawchhak atanga kuhva tawlh an awm vang hian kumin hian kuhva lei tuma dawrtu pawh an la awm lo.

Bilkhawthlir Kuhva Chingtu Co-Operative Society Ltd. hruaitute chuan duty hi a tul angin an la kalpui reng thu sawiin, “Kan bial hi a zau a, report kan dawn chuan Saipum, Khamrang, Bukvannei leh Bairabi thleng pawhin kan tlan dawr dawr mai thin a. Hetihlai hian kuhva hi a rukin a kal ve reng niin kan hria a, kuhva tawlhte pawh hian an tih dan thlakin tunhma lama Truck lian a phur tawh lovin Maxi Cab leh Car hmangte-in bag tam vak lo hian an thiar zeuh zeuh niin kan hria a ni,” an ti.

Mizoram tharchhuah aia khawchhak kuhva hralh a kal zawk chhan nia an hriat dan sawiin, “Khawchhak kuhva hi a pum a lian zawk a, a leitu company pawhin an duh zawk bawk a. A hralhna pawh hi a to zawk a, Truck full load-a phurte hian Kolkata-ah an hralh hian nuai 30-te an hlep niin an sawi a; chuvangin, mi thenkhat hian a rukin an kalpui reng niin kan hria a ni,” an ti.

Khawchhak kuhva vang hian kuthnathawktute tharchhuah kuhva hralh kawngah harsatna nasa tak an tawk tih sawi bawkin, “Kum dangah chuan November leh December-ah hian hnamdang hnenah kan hralh vek tawh thin a. Kumin ah erawh chuan a sen tan tawh chungin kum danga lei thin hnamdang tumah rawn kal an la awm lo a, kan hralh thei dawn nge dawn lo pawh kan la hrethiam lo a ni,” an ti bawk.

Mizoram khaw mala kuhva tharchhuak tam ber nia hriat, Bilkhawthlir khua hi In 1000 khua niin Kuhva chingtu chhungkua 800 atanga 900 vel an awm a, kuhva hralhna atangin nikum khan cheng vbc. 25 vel hmuh theih an in beisei laiin Rs. 17,20,43,000 vel an lei chhuak a. Kumin ah hian cheng vbc. 30 vel hmuh an inring a; mahse, khawchhak kuhva hi a luh reng chuan nikum lam pawh phak lo thei dinhmunah an ding niin Bilkhawthlir Kuhva Chingtu Co-Operative Society Ltd. hruaitute chuan an sawi bawk.

Tarlan tawh angin Hachhek Bial Kuhva Chingtu Pawl (HBKCP) pawhin kuhva tawlhruk a la awm reng nia hriain duty leh an tum thu thuchhuah siamin an tarlang a, Dan loa kuhva ro tawlhte avangin an kuhva tharte hralh a harin a man a tlahniam zel nia sawiin, kumin ah pawh kuhva rah lo zo vek tawh siin kuhva chingtu mi engemaw zatin a man pawh an la dawng kim lo niin an sawi a, Mizoram sawrkar chu Minimum Support Price a siam turah kuhva telh ve ngei turin an ngen bawk a ni.