Railways bungraw bo chungchanga thu thehdarh Police ten thu belhchian dawl lo ni tih an sawi

Mizoram Police te chuan North East Frontier Railway thuneitu ten Railways bungraw bo leh thubuaiah te Police ten hma an la tawklo anga ngaih theih tura thu thehdarh lo awm chu thu belhchian dawl lo a ni tih sawiin, “Rel kawng siam mekah hian pawikhawihna a thlenin Police ten theihtawpin chhuichhuah hna an thawk thin,” an ti.

Nimin-a thuchhuah an siamah Mizoram Police chuan Railways thuneituten Chief Minister an hmuh denchhen a Railways bungraw bo leh thubuaiah te Police ten hma an la tawklo anga ngaih theih tura thu thehdarh lo awm chu thu belhchian dawl lo a ni tih tarlangin, “Rel kawng siam mekah hian pawikhawihna a thlenin Police ten theihtawpin chhuichhuah hna an thawk thin a, thubuai tam zawkah bungraw rukbo te pawh hmuhlet leh a ni,” an ti a. Hei bakah hian pawikhawihna te a thlen nawn loh nan leh Rel kawng siamna bungruate a bo lohna turin Police ten theih ang angin an vilpui tih sawiin, “Rel kawng siamna hmunte tlawhin Patrolling neih thin a ni bawk,” an ti.

Mizoram Police thuchhuah chuan North East Frontier Railway ten Bairabi atanga Sairang Sihhmui inkar Rel kawng siam hna an thawh mek hian Kolasib District leh Aizawl District-te a kaltlang tih tarlangin, Police Station pathum (3) area a paltlang tih an sawi a. Home Department atanga hriattirna an dawn angin Rel kawng siam hna thawh meka harsatna leh thubuai lut awmah te hian Mizoram Police chuan theihtawpin hma an la thin tih pawh tarlangin, heng Police Station pathum-ah hian Rel kawng siam kaihhnawih ah thubuai 28 ziahluh tawh niin thubuai hmasa ber chu March 22, 2018-ah Kawnpui PS-ah ziahluh a nih thu leh thubuai thar ber hi Bairabi PS-ah March 9, 2024-ah ziahluh a ni tih an sawi a. Heng zinga thubuai 26 chu rukruk kaihhnawih niin thubuai dang pahnih chu invau leh insuam thubuai a nih thu an sawi bawk.

Mizoram Police te chuan bungraw bo te hi rel kawng siam hnathawktute Camp bulhnai leh hmanraw dahkhawmna hmun atanga bo a ni tlangpui tih pawh sawiin, “Rel kawng atanga bo a awm lo a tih theih a, hnathawktute hriat lohva ruk bo chu a harsa tlangpui ang,” an ti bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar