Champhai District mipui za zela 2.97 ten HIV an vei tih NACO in a tarlang

National AIDS Control Organization (NACO), 2022 tarlan danin Champhai District mipui za zela 2.97 (1664) te chuan HIV an vei.

Nimin khan Camphai District AIDS Prevention and Control Committee chu an Chairman leh District Bawrhsap James Lalrinchhana hovin DC Conference Hall-ah an thukhawm a, he hunah hian Zuiliani Hrahsel, Joint Director (IEC), MSACS chuan powerpoint presentation hmangin HIV do kawnga hmalak ngaihna leh hmalak dan turte a sawifiah a. National AIDS Control Organization (NACO), 2022 tarlan danin Champhai District mipui za zela 2.97 (1664) te'n HIV an vei thu leh Mizoram-ah a tlangpuiin damdawi khawih leh mipat hmeichhiatna hman khawlohna atanga HIV kai an tam ber thu a sawi a, tunhma a HIV kai thinte chauh ni tawh lovin mipui mimirah a lut nasa tawh a, hei vang hian inkaichhawn theihna lakah kan fimkhur tlan a ngai hle tih a sawi a. Invenna tura pawimawhte hriat a tul thu sawiin, a veite tan inhriatchhuah hma leh tha taka inenkawlna lak a tul a, hemi avang hian HIV kaihhnawih natna tam tak a pumpelh theih tih a sawi bawk.

He thutkhawm kaihruaitu Champhai District Bawrhsap James Lalrinchhana chuan tunhma atanga HIV/AIDS dona kalpui chuan rah tha a chhuah thu leh hmalakna te a thlawn maia a kal loh thu a sawi a. Champhai District chu ramri dep ruihhlo tawlhrukna kawng a nih avangin ruihhlo engemaw zat thlauh a nih thu tarlangin, thawhhona tha tak hnuaiah ruihhlo chak taka do niin thahnem tak man a nih thu a sawi a, ruihhlo do hian HIV/AIDS dona kawngah awmze thui tak a neih tel thu sawiin, Ram leh hnam hmelma, thalaite nun tichhe mektu HIV/AIDS do kawngah tha thlah a thiang lo tih a sawi bawk.

He hunah hian District AIDS Prevention and Control Committe (DAPCC) kaltlanga HIV/AIDS chungchang inzirtirna tun aia changtlung zawka kalpui dan turte ngaihtuahho a ni a. Champhai District huamchhung ah HIV a darh zel loh nan leh a vei mek te'n inenkawlna tha an dawn theih nan 'Zoram Harh Rawh Campaign' kaltlanga HIV/AIDS Awareness Campaign kumin June-October thla chhunga kalpui dan turte rel a ni bawk a. Thukhawm chuan Champhai District chhunga khaw hrang hrang 67 leh Zirna Inah te HIV/AIDS Awareness Campaign neih a, uluk taka vil zui nise an ti a. Mipui zirtir nan khawlai hmuh theih remchangah ualau takin inzirtirna lam hawi tam zawk pholan nise an ti bawk. Heng bakah District Community Resource Group (District-CRG) din dan tur leh a kalphung bakah hemi atana pawimawh hrang hrangte pawh he hunah hian sawiho a ni bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar