Dan kalha naupang hruaibo ven dan tur ngaihtuah

Nimin khan Khawzawl-ah District Inspection and Monitoring Committee on Prevention of Illegal Transportation of Children chu an Chairman leh Khawzawl DC hova thukhawmin Dan kalha naupang kumtlinglo hruai bo tihtawp leh ven dan tur an sawiho.

He thutkhawm kaihruaitu Khawzawl DC K. Lalrohlua chuan he thutkhawm a tel te chu naupang kumtlinglo te venhimna kawngah an mit leh beng len a, theihtawp chhuah theuh turin a ngen a. Hemi hnu hian Khawzawl District chhunga naupang venhimna kawnga thawktu – District Executive Force (SP Office), District Child Protection Office (DCPO) leh Child Welfare Committtee (CWC) te hnen atangin an hmalakna leh hmachhawp te ngaihthlak a ni.

Khawzawl District Child Protection Officer Lalsiammawii chuan Mizoram chhunga naupang hruai bona case hrang hrang awm tawh te sawiin, thiam thil bik nei lo tan rampawnah pawisa tam tak hlawh ngawt a theih loh thu mitinin an hriat a tul thu a sawi a. Khawzawl District SP Lalchhuanthanga chuan Mizoram Police hnuaiah District tinah Anti-Human Trafficking Unit din a nih thu sawiin, Khawzawl Police Station-ah pawh Child Friendly Room leh Women Help Desk te dah a nih tawh thu a sawi a. Khawzawl District Child Welfare Committee Chairman PC. Rosiama chuan ramdanga hnathawh tum te chu Agency rintlak kaltlanga kal hram hram tura inzirtir a tul thu a sawi bawk.

He thutkhawm hian Khawzawl SP hnuaia Anti-Human Trafficking Unit chu chak zawka kalpui tha an ti a. High School leh Higher Secondary School-ah Human Trafficking kaihhnawih inzirtirna kalpui relin Public Transport – Sumo, Taxi etc te chu an mi phurh te ah he lam kaihhnawih rinhlelhawm an awm a nih chuan thuneitute hnena thlen vat turin an ngen bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar