State pawn-a Duty Police ten Vote an thlak loh thu ah Eptu Party te PM leh ECI-ah an zualko

Mizoram-a Political party panga (5) te chuan Lok Sabha Inthlanpui a Duty Mizoram Police 1047 te Vote thlak thei lova siam an nih chungchang ah an lungawi loh thu nimin khan Prime Minister leh Chief Election Commissioner te hnenah ziakin an thlen a, vote an thlak ngei theihna tura hma la turin an ngen bawk.

Heng Political Party te hian Prime Minister leh Chief Election Commissioner te hnenah hian lehkha ziak inang thawnin Mizoram State Armed Police Force (SAPF) Company 15-a Police 1047 te chu Bihar, Uttar Pradesh leh Madhya Pradesh-ah te MP inthlan duty tura tirhchhuah an nih thu leh Mizoram bikah April ni 19-ah vote thlak a ni dawn tih leh inthlanna buatsaih dan tur kimchang pawh hriat lawk vek a ni tawh chungin heng Police-te hian vote an thlak theihna tur ruahmanna engmah siamsak hmasa lovin Mizoram sawrkar thuneitute chuan inthlan duty turin Mizoram pawnah an tirchhuak tih an sawi a, hetianga Police 1047 zet vote thlak thei lova siam hi State sawrkar hmalakna hnuaia Dan bawhchhiatna lian tak niin an sawi bawk.

Eptu party hrang hrangte hian Election Commission of India leh India sawrkarin tun tum Lok Sabha inthlana vote thlak vek tura vote nei zawng zawngte zirtirna beihpui an thlak dan chu fakawm an tih thu sawiin, hetihlai hian Mizoram sawrkarin a hnuaia thawk Police 1047 zet mai vote an thlak theihna tur remchang siamsak hmasa lova inthlan duty tura a tir chhuak chu ram Danpui hnuaia an dikna leh chanvo bawhchhiat sakna langsar tak, mipui rorelna chawisang zel tura hmalakna kalha chetna a ni tih an sawi a. Mizoram Police 1047 ten June 4, 2024-a vote chhiar a nih hma ngeia vote an thlak ve ngei theih dan tur ruahmanna siamsak turin Prime Minister leh Chief Election Commissioner te chu an ngen a ni.

He Lehkha an thehluh ah hian MPCC President Lal Thanzara, MNF President Zoramthanga, BJP President Vanlalhmuaka, Mizoram PC Party President Vanlalruata leh AAP Mizoram President Andrew Lalremkima ten hming an ziak a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man