Mizoram-a Frozen Vawksa rawn lut tur dan kawngah MIPFA in theihtawp a hmalak an tum

Mizoram Pig Farmer’s Association (MIPFA) chuan Mizoram-a Frozen Vawksa rawn lut chu dan phal loh nia sawiin, a dan kawngah theihtawp an chhuah dawn tih an sawi a. Mizoram-a ASF hri leng mek chu a ziaawm theih nan hmalak an tum thu leh kum 2022-a ASF vanga Vawk suat te hnenah zangnadawmna pek thuai an phut thu an sawi bawk.

Nimin-a Aizawl Press Club-a thuthar thehdarhtute an kawmna ah MIPFA hruaitute chuan Mizoram-ah April 16, 2021-ah ASF confirmed a ni tih sawiin, Mizoram pum a run avangin Mizoram Pig Farmer's Association pawh August 11, 2021-ah a lo piang tih an sawi a. Kum 2021 leh 2022-ah kum zawnin ASF hri in Mizoram pum min run a, hemi avang hian Vawk, Vawk sa atanga eitur siam chhuah leh Frozen Vawksa State pawn leh ramdang atanga lak luh a khap a ni tih sawiin, “Amaherawhchu kum 2022 a hunpui vuakveta State pawn atanga lakluh phalna sawrkarin a tihchhuah chu vil zuina a awm loh avangin ASF hri veilo an nih leh nih loh pawh enfiah loh Vawksa Frozen te hi zalen takin sumdawng ten an la lut mek a ni,” an ti a. Frozen vawksa lakluh phalna chu a nung tawh lo tih sawiin, “Frozen Vawksa rawn lut reng reng hi dan phalloh a ni a, Tuna Frozen Vawksa zuar hi an kawl sa te tihral nan tun May thla chhung hun kan pe a, hemi bakah lakluh belh emaw, zuar an awm chuan an chungah engpawh thleng se Association in mawh a phur lo ang,” an ti bawk.

Frozen vawksa lakluh hian Vawkvulhtute Vawk hri lakah an him loh phah nia sawiin, “Tunah pawh ASF hri a leng leh mek a, kum zawna hri in a run tawhna atang pawhin an la din mar theihloh laiin Frozen Vawksa lo lut hi Vawkvulhtute tan chuan ASF tluk zetin a hlauhawm a, zawi muangin Vawkvulhtute an ei hlum mek a, Economic Assimilation a thlen tir mek a ni,,” an ti.

MIPFA chuan tun thla ni 3-a RTI hmanga Information an dawn ah kum 2022-a ASF avanga Vawk suat te zangnadawmna tur sawrkar laiipui-a dil ah zaa 25 (25%) chu rawn release a nih thu leh State Matching Share tur Mizoram sawrkar-ah dil mek a ni tih sawiin, Sawrkar chu a rang thei ang bera pechhuak tura an ngen thu an sawi bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar