Governor in zirlai tithate lawmpuina a hlan

Mizoram Governor Dr. Hari Babu Kambhampati chuan kumin a HSSLC leh HSLC Exam Result chhuaka Mizoram pum-a pakhatna te chu niminpiah khan Raj Bhavan-a leng-ah sawmin chawimawina thuziak leh pawisafai a hlan.

Governor hian Higher Secondary School Leaving Certificate (HSSLC) Examination 2024-a Arts, Commerce leh Science Stream-a pakhatna theuh te leh High School Leaving Certificate (HSLC) Examination 2024-a pakhatna te hi an nu leh pa te nen Raj Bhavan-a leng-ah sawmin zirlai titha te hi a mal te te in a kawm a. Lehkha zir chhunzawm an tum dante zawtin, hna leh eizawnna chungchangte a sawipui a. Zirlai titha zual te chu a lawmpui tih sawiin, an thiamnate chu an hmalam huna hna tha tak leh eizawnna ngelnghet tak an neih theih nana hmang turin a fuih bawk. Chawimawina thuziak leh pawisafai a hlan a ni.

Mizoram Board of School Education (MBSE) in kumin-a HSLC Exam a buatsaih ah hian Lalmoipuia Lawmzual, St. Paul's Higher Secondary School, Aizawl chu pakhatna niin HSSLC Exam 2024-ah Lalramdina Ralte, St. Paul's HSS chu Science Stream-ah pakhatna a ni a, Commerce Stream-ah David Lalhminghlua, St. Paul's HSS chu pakhatna niin Arts Stream-ah Linden Lalremruatpuia, Oikos HSS chu pakhatna a ni bawk.