MEFCOF hmalakna sawrkar in thawhpui zel a tum dawn

Chief Minister Lalduhoma chuan nimin khan a Pisa-ah Mizoram Environment & Forest Consultative Forum (MEFCOF) hruaitute kawmin an hmalakna te a sawipui.

He inkawmna ah hian Chief Minister chuan mahni sum leh pai senga ramngaw humhalh leh tuihna tihpunna lam buai-puitu MEFCOF chu pawl zahawm tak nia a hriat thu a lo hrilh a. An ruahmanna te a hlawhtlin theih nan sawrkar pawhin thawhpui zel a tum dawn tih sawiin, an ruahmanna te chu ziaka thlen turin a chah nghal bawk a ni.

MEFCOF hian an bul tan nan kum 2004 khan Neihdawn-ah ‘Zo Thei Huan’ an siam a, a hnuah Chawngtlai-ah din lehin, khaw hrang hrang ah kalin ramngaw humhalh tulna an zirtir zel a. Zo Thei Huan Committee din zelin chung pawl te chuan an khaw Zo Thei Huan chu an enkawl zel a, tunah hian khaw 174 ah Zo Thei Huan hi an din tawh a ni.

An thupui ber chu ‘khawih loh’ tih a ni a. Khaw tinah humhalh theih ngaw awm te tha taka humhalh a, nungchate pawh zalen taka awmtir chu an tum ber a ni. Tuihna kam zel a lo pun thar theih nana Rain Garden Policy an duan chu Chief Minister hmaah sawifiahin; Tlawng lui tuihna tipung tura Pilot Project kalpui an duh thu an thlen nghal a ni. An pawl hruaitu VL. Bela chuan kum 1975 atang khan Tlawng lui hi a hun leh hmun ngaiah kumtin tui san zawng a la teh ziah thin a ni.