Universal Health Care Scheme a taka kalpui a nih theih nan hma kan la mek - Health Minister

Health and Family Welfare Department changtu Minister Lalrinpuii chuan mipui huapzo Universal Health Care Scheme chu a taka kalpui a nih theih nan hma an lak mek thu a sawi.

Nimin-a ZPM Party in Aizawl-a an Office-a Chhung Inkhawm an neih ah Minister Lalrinpuii chuan Thla ruk (6) dawn Sawrkarna an lo chang ve dawn ta reng tih sawiin, an hmachhawp Tar pension Rs. 1000/- a tihpun a nih thu leh Upa leh rualbanlote tana awlsam zawka Civil Hospital-a an inentir theih nan a hranpa Counter siam a nih bakah anni bik tan hian Card Eng siam sak a ni tih a sawi a. “Chu mai bakah Rualbanlote tan awlsam zawka Office dawr theihna buaipui mek ni bawk,” a ti a. Hun vawn dik chungchangah pawh Biometric attendance kalpui mek a ni tih sawiin, “Ka Department chan Office hrang hrangah pawh hman mai theih turin kan buaipui mek a ni. MLA-te kan buaina thin em em na pakhat, ruang phurh chungchangah pawh Budget-ah nuai 500 kan dah tawh a, hei hi Cabinet Meeting hmasa berah min pawmpui turin kan peihfel tawh a ni,” a ti a. Health Care Scheme chu nasa taka zirchian ngai a nih avangin uluk takin vawi tam Official-te nen sawiho a ni tih sawiin, “Tunah hian mipui huapzo ‘Universal Health Care Scheme’ hi a taka kalpui a nih theih nan hma kan la mek a ni. He Health Care Scheme-ah hian cheng nuai 5 (nga) thleng pawisa pek ngai lovin Damdawi In-ah kan in enkawl thei dawn a ni,” a ti bawk.

Tourism Department hnuaia an hmalakna te pawh tarlangin Minister Lalrinpuii chuan, “Mizoram pawn atangin khualzin tam tak Mizoram-ah an lo lut thin a, heng khualzinte lo chiauau a lo buaipuitu tur kan dah,” a ti a. Mizoram-ah hian Festival pahnih- Winter Festival leh Anthurium Festival chu Central hriatpui Festival leh tanpuina pawisa min pek thin a ni tih sawiin, “Anthurium Festival erawh mipuiin an ngaihhlut tawk loh nia kan hriat avangin avangin tihtawp a ni a, a aiah Leitlangpui Music Festival hi Lunglei-ah nei tura hmalak mek a ni,” a ti. Ruihhlo in kan ram nasa taka min run thu leh hemi kawngah hian nasa takin hmalak an tum thu pawh sawiin, “Mizoram chhunga Kohhran hrang hrangte, NGOs hrang hrang leh Department thenkhat Official te nen engtin nge heng ruihhlo ngaite leh ruihhlo bawih-a tangte hi kan enkawl ang tih kan ngaihtuah a ni. Chuvangin heng harsatnate hi sutkiana a awm theih nan theihtawpa tawngtaina nen kan beih a ngai a ni,” a ti bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar