MBSE in kumin a HSSLC Exam result tichhuakin Zirlai exam zinga za zela 78.04 ten an pass

Mizoram Board of School Education (MBSE) chuan kumin 2024-a Higher Secondary School Leaving Certificate (HSSLC) Exam result chu nimin khan a tichhuak a. Mizoram puma Zirlai Exam zawng zawng mi 11,824 zinga 9227 an pass a, pass percentage hi za zela 78.04 niin nikum aiin 0.62 in a hniam zawk a ni.

Nimin-a HSSLC Exam Result chhuak ah hian a pumpui-ah zirlai Exam 11,824 awmin heng te hi Mipa 5457 leh Hmeichhia 6367 te an ni a, heng atang hian zirlai Mipa 4274 leh Hmeichhia 4953, an vaiin 9227 an pass a, zirlai Exam zawng zawng atanga chhutin za zela 78.04 in an pass a, Distinction-ah mi 639 pass in 1st Division-ah 3367, 2nd Division-ah 3525 leh 3rd Division-ah 1696 te an pass a, Subject bat nei, Compartmental Chance nei mi 52 awmin zirlai 2545 te an Fail thung a. Compartmental Chance nei zirlai naupang ten admission an tlai lohna turin Compartment Exam hi buatsaih thuai an tum thu leh HSSLC Result complaint hun chu result chhuah atanga ni 7 (sarih) anih thu MBSE Chairman JH. Zoremthanga chuan a sawi bawk. MBSE Chairman chuan Result tluang taka a chhuah theih chhan chu Higher Secondary School Zirtirtute inpekna vang a ni tih pawh sawiin, Education Department pumpui tanrualna vang anih thu pawh a sawi bawk a ni.

Arts Stream-ah zirlai exam 8467 awmin 6749 an pass a, za zela 79.71 pass ang niin 1680 an fail thung a, Compartmental Chance nei mi 38 an awm a ni. Arts-ah hian Distinction-ah 483 pass in 1st Division-ah 2012, 2nd Division-ah 2643 leh 3rd Division-ah 1611 an pass a, Linden Lalremruatpuia, Oikos Higher Secondary School chuan Mark 500-ah Mark 471 hmuin pakhatna a ni.

Science Stream-ah zirlai 2808 ten Exam hmachhawnin 2041 an pass a, za zela 72.69 pass ang niin 756 an fail a, zirlai 11 ten Compartmental Chance an nei a. Distinction-ah mi 103 pass in 1st Division-ah 1198, 2nd Division-ah 706 leh 3rd Division-ah mi 34 an pass a, Lalramdina Ralte, St. Pauls Higher Secondary School chuan Mark 500-ah Mark 477 hmuin pakhatna a ni bawk.

Commerce-ah zirlai 549 ten exam hma-chhawnin 437 an pass a, Exam zawng zawng atanga chhutin za zela 79.60 an pass a, zirlai 109 te fail in Compartmental Chance nei mi 3 an awm bawk. Commerce-ah hian zirlai 53 ten Distinction-ah pass in 1st Division-ah 157, 2nd Division-ah 176 leh 3rd Division-ah 51 an pass a, a pumpui-ah David Lalhminghlua, St. Pauls Higher Secondary School chuan Mark 500-ah Mark 460 hmuin Pakhatna a ni bawk. Arts-ah hian Top 10-ah mi 15 langin Science leh Commerce-ah mi 11 ve ve an lang bawk a ni.