Dan zawm lo nia hriat MLA te Speaker-ah thlen; Speaker in Dan an bawhchhiat a hre lo thung

Mizoram-a Political party pahnih, Aam Aadmi Party (AAP) Mizoram leh Peoples Conference (PC) Party te chuan Mizoram-a MLA 16 te chu Dan kalha an thuneihna piah lama nihna chelh nia an hriat avangin Dan anga hma la turin Assembly Speaker an ngen a. Speaker chuan heng MLA te hian Dan an bawhchhe lo niin a sawi thung.

Aam Aadmi Party (AAP) Mizoram leh Peoples Conference (PC) Party te hian ram siamtha tura an thawhhonaa an hmalakna hmasa atan nimin khan Mizoram Legislative Assembly Speaker hnenah leh Zoram Peoples Movement (ZPM) Party leh Val Upa Council (VUC) hnenah thu inang thlenin, he an thu thlen ah hian ‘The Rules of Procedure and Conduct of Business in Mizoram Legislative Assembly’ anga Assembly Subject Committee pakhat aia tama MLA te member an nih theih loh laia MLA 16 lai Committee pakhat ai a tam a an tel thu leh he dan vekin Minister te Committee-a member nih a khap laia Portfolio nei thlapa Minister of State Rank and Status nei MLA 4 te Committee hrang hranga an tel thu bakah he dan vekin Ethics Committee-a Govt. Chief Whip/Govt. Whip tel a khap laia Whip chu Member anih thu te an tarlang a. “Kan rama rorelna In sang bera hetiang nasa taka dan bawhchhiatna a awm hi a pawi kan tiin a tha lo kan ti takzet a. Ram hruaitu pawimawh ten kan rorelna In sang bera dan an bawhchhia anih chuan thil tha lo tam tak a thlen thei ang tih kan ring a. Chu mai ni lovin hetianga dan bawhchhiaa nihna nei te hi dan ang taka siamrem anih chuan mipui sum (public money) tam tak hum (save) theihna a ni dawnah kan ngai,” tiin heng dan bawhchhiatna te hi tihtawp nghal anih theih nana hma la tur emaw, hamthatna insiam sak nana hetianga kal hi a tul anih chuan dan hi siamthat anih nana hma la turin an ngen a ni.

He an thu thlen chungchangah hian Assembly Speaker Lalbiakzama chuan heng MLA 16 te hian Dan bawhchhiatna an nei lo tih a sawi ve thung a. Assembly Speaker thu angin Mizoram Legislative Assembly-a Commissioner & Secretary Vanlalthantlingi chuan nimin vek khan heng Party pahnih President te hnenah hian lehkha thawnin, Rules of Procedure and Conduct of Business in Mizoram Legislative Assembly Section 277 (2) bawhchhia a puhna chungchang ah, “He dan hi Rules Committee (2021) First Report ni 9.10.2020-a Honourable Speaker hnena present in a delete tawh a ni a. Chuvangin, dan bawhchhiatna a awm lo,” a ti a. “He danah hian Subject Committee a tel khap zingah hian Minister tih chauh a ni a, Minister anpui leh a tlukpui (equivalent) ang remlohna a awm lova. Chuvangin, Adviser to Chief Minister te hi Minister an ni lova, MLA hlawh la an nih angin Subject Committee-a an tel a rem lohna hriat a ni lo,” a ti bawk.

Hetiang bawk hian Section 247, 250, 252, 254, 261 leh 267 bawhchhia nia puh chungchang ah Adviser to Chief Minister te chu Minister an ni lova, MLA hlawh la an nih angin heng Committee-ah te hian an tel a rem lohna hriat a nih loh thu leh Section 288-ah Govt. Chief Whip or Govt Whip leh Minister tih ah Deputy Govt. Chief Whip a huam tel loh thu a tarlang a. “Term hmasa pahnih ah te pawh, Pu Lalrintluanga Sailo leh Pu RL. Pianmawia te kha Assembly Committee members mai nilovin Chaiman dinhmun te pawh an lo luah thin a ni,” a ti a. “He dan in a sawi angin Minister an ni lova, a chunga sawi tawh ang khian MLA hlawh la mek an ni,” tiin Deputy Govt. Chief Whip leh Adviser to CM te din-hmun hi a tarlang bawk.

Assembly Speaker chuan MLA 16-te an puhnaah dan bawhchhiatna a awm lo a a hriat thu sawiin, “Hun la awm zel turah ram tan a tha zawk leh rawtnate a awm chuan ka inhawng reng a, dan bawhchhia-a hriatna a awm pawhin kan ngaihthla theih reng. Mahse, sawiho hmasa a a nihna tihchian phawt hnuah Public Domain/Social Media-ah te thehdarh ni ta chauh thin se a tha,” a ti bawk.

Comments

Popular News (Last 30 Days)

Vawiin-ah HSSLC Exam result