Serchhip District-ah Lok Sabha Inthlanpui-a Vote tla chhiar turin ruahmanna siam fel a ni
Serchhip-a Election Officer Gaston Vanlalhriatpuia chuan Lok Sabha Inthlanpui-a Serchhip District-a Vote tla te chhiar tur hian Counting Hall pathum (3) siam a ni dawn tih LENKAWL hrilhin, Serchhip District chhunga Assembly Bial pathum te tan a hrang theuh in Counting Hall hi siam a ni anga, Serchhip DC Conference Hall-ah Serchhip Bial chhunga Polling Station hrang hranga Vote tla te chhiarin DC Meeting Room-ah Tuikum Bial-a Vote tla te leh E-District Building-ah Hrangturzo Bial-a Vote tla te hi chhiar a ni ang. Ruahmanna siam a nih danin heng Counting Hall tinah hian Dawhkan pariat (8) zel dahin a rualin Polling Station 8-a Vote tla te hi chhiar tur a ni dawn a, Round 4-ah Vote tla te hi chhiar zawh hman vek tura ruahman a ni bawk. Vote chhiar hna thawk tur hian Micro Observer atan mi 43 ruatchhuah niin Counting Supervisor atan mi 33 leh Counting Assistant atan mi 35 ruatchhuah an ni a, heng mite tan hian May 29 leh June 3-ah Training buatsaih leh a ni anga, heng mite atang hian Computer Software hmangin Vote chhiar tur thlanna (Randomization) pawh neih leh a ni dawn bawk a ni.
Lok Sabha Inthlanpui-a Serchhip District-a Vote tla te chhiar tura ruahmanna siam fel a nih hnuah nimin khan Serchhip DC Office-a Vote thlakna khawl dahna te chu hawngin EVM First Level Checking neih a ni a. Lok Sabha Inthlanpui neih a nih dawn khan Serchhip District a Vote thlakna khawl awm mek zinga engemaw zat chu hman mai theih tura siam niin heng te atang hian Polling Station hrang hranga hman turte chu thlanchhuah leh a nih bakah thlaveng turte pawh thlan a ni bawk a. Inthlanna a hman zui tak loh te pawh hi venhimna hnuaiah dah zui niin nimin khan Election Officer Gaston Vanlalhriatpuia leh Senior Micro Observer Robert Zosangliana hovin hawn a ni a. June ni 4-a Vote chhiar tura ruat Counting Official te training na atan heng khawl te hi hman theih tura buatsaih niin Company Engineer te kaihhruaina hnuaiah he hna hi thawh a ni.
Serchhip-a Election hotute chuan Serchhip District-a Lok Sabha Inthlanpui a Vote thlak ni khan hmun thenkhat ah Mock Poll neih laia EVM chiang lo a awm thu sawiin, Vote thlak tan a nih hnuah erawh EVM chiang lo leh thlak ngai a awm loh thu an sawi a ni.
Comments
Post a Comment