CM in Northeast Frontier Railway hotute a kawm

Chief Minister Lalduhoma chuan nimin khan a Office-ah Northeast Frontier Railway-a General Manager Chetan Kumar Shrivastava leh a thawhpuite kawmin Bairabi leh Sairang inkara Rel kawng an siam mek chungchang a sawipui.

Chief Minister chuan nikum-a Sairang-a chhiatna an tawk kha pawi a tih thu NFR hotute chu hrilhin, an hnathawh mekah harsatna an neih te a hnenah thlen thin turin a hrilh a. Sairang Station-ah RoRo System (Roll on Roll Off) awm thei se a duh thu leh a taka Rel a lo thlen hunah ram leilung fate a tam thei ang ber hnathawka chhawr a duh thu a lo hrilh a ni.

Cheetan Kumar Shrivastava hian, Mizorama Rel kawng an siam mekah an thir te misualin an ruksak nasa tih sawiin, hetiang hi State dangah a thlen ngai pawh an hriat loh thu leh Gas hmanga an tan sak bakah bolt te, bearing te a bo nasa tih a sawi a, “Motor te rawn kengin an phur chhuak hial thin, kan mangang hle a ni,” a ti a. Hetiang reng anih chuan lei (bridge) tam tak te chu chhiatna nasa zawk tawk thei an ni tih sawiin, FIR te pawh an thehluh thin thu a sawi bawk. Bairabi to Sairang Rel kawng hi nakum July thlaa zawh hman an inbeisei tih an sawi bawk.