Padma Shree Award dawn lawmna hun hmanpui

Ramchhunga Civil chawimawina sang, Padma Shree Award dawngtu TNT Founder Sangthankima chawimawina dawn lawmna inkhawm Inrinni-a TNT, Muanna Veng-a neih chu Chief Minister Lalduhoma leh Home Minister K. Sapdanga ten an telpui.

Chief Minister chuan Pathian koha rawngbawltute thuawih chu malsawmna a nih thu sawiin, TNT dintu Sangthankima pawh Pathian in a kohna ang taka hnathawktu a nih thu a sawi a, amah thawhpuitu zawng zawng te pawh a thu lo awih zel turin a chah a, “Pathian duh dan ang zela kalin Pathian a chawimawi tlat a, nasa takin Pathian in a chawimawi let ve ta a ni,” a ti. Home Minister K. Sapdanga pawhin harsatna tawk mi sing têl lo enkawl tawhtu Sangthankima hnathawh chu a ropui tih sawiin, chawimawina a dawn pawh a phu ngawih ngawih tih a sawi a, “Ani tluka phu an awm bik chuang lo,” a ti bawk. 

Thutak Nunpuitu Team (TNT) hi Sangthankima hian Nov. 4, 1984 khan Champhai daiah a kalpui tan a, a hnuah Aizawl lamah insawnin Durtlang-ah bul an tan a, a hnuah tuna an awmna ram hi K. Thangzuala’n a hmantir ta a ni. TNT hian thalai chhanchhuah ngai mi 43,355, Pangpar huanah mi 2,414 leh fahrah 939 an enkawl tawh a. Tun dinhmun ah Addict Centre pahnih ah mi 840, Pangpar huanah mi 550 leh fahrah 340 an nei mek a. An enkawl zingah hian hnamdang engemawzat an tel a. Aizawl pawn lamah Kolasib-ah mi 367, Lunglei-ah 720, Champhai-ah 320 leh Tahan-ah mi 250 an enkawl mek bawk.

TNT atanga tha taka enkawl chhuah tawh TNT Team Worker 94 an awm mek a, TNT atanga pawl 10 pass naupang 184 an awm tawh bakah BA leh MA thlenga pass pawh an nei nual tawh a ni.

Comments

Popular News (Last 30 Days)

Vawiin-ah HSSLC Exam result