Myanmar atanga Mizoram-a raltlan lut pung zelin raltlan mi 35,489 vel zet an awm tawh

Myanmar ramchhung Chin State hmar lam Tonzang leh Cikha khua a Myanmar sipai Hmunpui te Chin National Army (CNA) leh an thawhpui PDF pawl hrang hrangin an lak hnua indona kal zelah Mizoram-ah raltlan an la pun belh zel.

Tunkar Thawhlehni leh Nilaini zing thleng khan Myanmar atang hian raltlan hi 55 an lo lut a, an zinga 46 hi Myanmar atanga lo lut an ni a. Thawhlehni a lo lut thar mi 44 te hi Hakha, Khawmawi, Falam, Tedim, Tahan, Tuingo leh Khampat atanga lo lut niin Champhai District-a Zokhawthar-ah an khawsa rih a. Midang 2 lo lutte chu Saitual District-a Mimbung khua-ah an awm mek thung. 'Mipui Tangrual Sipai' an tih maite'n Chin State hmarlam khaw engemaw zat-a Myanmar sipai Camp an lak hnu hian Myanmar indo Thlawhna te chuan helai bial vel hi a bomb zui zel a. Tonzang leh Cikha khua bakah Lungtak leh Phaitu-ah pawh bomb an thlak nasa hle a, bomb thlak avang hian Biak In tiamin In 40 aia tlem lo a chhia ni a thudawn a ni a. Ningani thleng khan silai ri a la reh lo niin an sawi bawk. Tonzan vela bomb thlak a nih avang hian Khawmawi leh Rihkhawdar khaw mite chu ralkhelin niminpiah khan Zokhawthar-ah mi tam tak an rawn tlan lut ve leh bawk a, heng mite erawh hi chu tlai lamah an kir ve leh thung a ni.

Chin State hmarlama inbeihna nasa tak avang hian May ni 16 atanga tunkar Thawhtanni thleng khan raltlan 938 chu Champhai District-a Vaikhawtlang, Khuangphah leh Hnahlan-ah te an lo lut tawh a. Hemi rual hian mi 168 chu Saitual District-a Teikhang, Kawlbem leh Mimbung khua-ah te an lut bawk a. Chin State chhim lam Vairum, Salachhuah, Laty, Bakla, Piedo, Bakalei leh Tisavai khua atangte in raltlan mi 198 zet Siaha District-ah lo lutin Laki, Lomasu leh Lopu khua-ah te an awm mek bawk.

Anni hi Maraland Defence Force (MDF) leh Chinland Defence Force (CDF-Mara) te innghirnghona boruak a san tak avanga rawn tlanchhia ni a thudawn a ni. Chin State chhim lam tho Paletwa khua leh a chhehvel atangin Khumi hnam mi 22-te chu Lunglei District-a Khawmawi khua-ah an rawn ral tlan bawk a. Anni hi Arakan Army hel pawlin an tihbuai thin vanga rawn tlanchhia ni a hriat a ni. Heti hian Mizoram-ah Myanmar atanga rawn ral tlan hi niminpiah thleng khan mi 35,489 an awm tawh ni a chhut a ni.

Hetihlai hian Thawhlehni chawhnu lam khan Bangladesh atangin Lawngtlai District a Hmawngbu khua-ah raltlan 3, chhung khat vek an lo lut a. Nilaini zing khawvar hma khan mi 6 dang an lo lut leh bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man