Serchhip leh Keitum vel-a leivung paih dan rawn enfiah

Mizoram State Project Monitoring Committee (MSPMC) chuan NH-54, Aizawl - Tuipang kawngpui siam meka Serchhip leh Keitum chhehvel leivung paihin a nghawng dan Zirtawpni khan an enfiah.
Mizoram State Project Monitoring Committee (MSPMC) Team te hian NH 54 Aizawl – Tuipang kawng NHIDCL hnuaia siam mek leivung paihin Serchhip leh Keitum chhehvel ram a nghawng dan hi a hmunah rawn enfiahin, kawngpui laihna leivung paihna (Spoil Bank) an siam mekte a tha tawk em tihte uluk taka an en bakah a bulhnaia huan leh ram a tihchhiat siam that hna thawh dante an en a, an hmabak hnathawh chhunzawm dan turte an sawipui bawk. He hunah hian kawng laih hna thawktu KRAM Infracon Pvt. (Ltd) hotute bakah New Serchhip North leh New Serchhip South VCP te, Keitum VCP te an tel bawk a ni.

MSPMC hian sawrkar hmalakna hrang hrang an lo enfiah tawh a, he Committee Secretary Er. Vanlalruata Sailo chuan MSPMC hian Mizoram a hmasawnna hnathawh hrang hrangte dik taka thawh a nih a, a puitlin a mipui ten kan chhawr tangkai ngei theih nan endik leh ven hna ah sawrkar a tanpui zel dawn tih a sawi a, chutianga thawhpui atan chuan Mizo mipuite a sawm bawk a ni.

MSPMC Team te hian Serchhip an rawn panna kawngah sawrkar laipui-a Ministry of Tribal Affairs atanga sum hmuh cheng nuai 426.801 hmanga siam mek KM 12-a thui Sumsuih – Turial Link road (RCC Pavement) chu an en bawk a, ruahman ang taka a puitlin a, tangkai taka hman a nih theih nan an thil hmuh dante thuneitute hnenah an thlen dawn bawk a ni.

Heng hmalakna an enna ah hian MSPMC Secretary bakah hian MSPMC-a Member George Lalzuia leh Lalremsangi Fanai bakah  Vanchhungi, Task Force (MSPMC) leh sawrkar mi pawimawh dang ten an tawiawm a ni.