Kuhva tawlhru te dang turin HBKCP te Duty dawn

Hachhek Bial Kuhva Chingtu Pawl (HBKCP) chuan Kuhva tawlhru te dang turin an Duty leh dawn tih sawiin, sawrkar in thlai thenkhat a Minimum Support Price a siam turah Kuhva telh ve ngei turin an ngen bawk.

Nimin-a thuchhuah an siamah Hachhek Bial Kuhva Chingtu Pawl (HBKCP) chuan an eizawnna ber Kuhva hralh kawnga harsatna siamtu, ramdang atanga dan lo a Kuhva tawlhluh a tawp theih nan nasa takin hma an lak thu leh Kuhva huan siamtu tlawmngaia duty te pawhin dan lo a Kuhva ro tawlh hi engemaw zat an lo man tawh thu sawiin, “Kuhva tawlhruk dang chat tur hian Mizoram Sawrkar tharah beiseina sang tak kan nei a, sawrkar hmalak tum dan leh hmalak chhoh dan pawh lawmawm kan ti hle,” an ti a. Sawrkarin theihtawp a chhuah mek ni a an hriat laiin Kuhva ro tawlhte hian an tihdan pangngaiin an la tawlhru reng nia an hriat thu leh Customs, Assam Rifles, Mizoram Police leh Kuthnathawktu duty te pawhin thahnem tak tak an la man reng tih sawiin, “Hemi anih avang hian HBKCP pawhin Kuhva tawlhru te dang tur hian a duty leh dawn a. Kuhva tawlhru thinte lokal lo turin kan hriattir nghal e,” an ti. 

HBKCP chuan Dan lo a Kuhva ro tawlh chungchanga Social activist Vanramchhuangi’n Gauhati High Court Aizawl Bench-a PIL a thehlut kha lawmawm an tih thu pawh sawiin, “He thubuai hi CBI ten chhui tura High Court a ngenna hi High Court-in a pawm ngei pawh kan beisei laia, Mizoram sawrkar-in CBI chhuitir lo a, Mizoram Police te chhuitir tura High Court-ah ngenna a siam ta mai hi pawi kan tiin Kuhva chingtute hmakhua a ngai tawk lo ah kan ngai,” an ti a. Kuhva ro chungchanga PIL hi CBI chhui remti ngei turin Mizoram Sawrkar an ngen thu an tarlang a. Kuhva tawlh ruk PIL chungchanga Gauhati High Court, Division Bench Order kumin January 22-a tihchhuah in in a sawi anga kum 2021-a FIR thehluh tawh tun thlenga register anih loh chhan sawifiah tura a tih te, Case thara register theih a nih thu a sawite chu bawhzui a, Court-in sawrkar chu he case hi a ngai thutak tawklo a tihte chu pawi an tih thu an sawi a. “Kuhhnathawktute hmakhaw ngaia Kuhva chingtute tana huai taka ding a, hmala turin Mizoram Sawrkar kan phutin kan ngen a ni,” an ti bawk.

Mizoram sawrkarin a ram mipui kuthnathawktute tana thlai thenkhata Minimum Support Price a siam turah Kuhva telh ve ngei tura sawrkar ngenin, “Dan loa Kuhva ro tawlh te avangin kan Kuhva tharte hralh a harin a man a tlahniam zel a. Kuminah pawh Kuhva rah lo zo vek tawh siin Kuhva chingtu mi engemaw zatin a man pawh kan la dawng kim theilo a ni. Kuhva chingtute au aw hi ngun taka min lo ngaihthlak sak turin Mizoram sawrkar kan ngen e,” an ti bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man