Mipui nunphung nghawng thei thil ah State sawrkar leh AR te inrawntawn tha a tih thu CM in a sawi

Chief Minister Lalduhoma chuan Assam Rifles ten mipuite nunphung nghawng thei engemaw thiltih an neih dawnin State sawrkar nen inrawntawnin tih thin a duh thu a sawi.

Chief Minister hian nimin khan Lt. Gen. RC. Tiwari, General Officer, Commanding-in-Chief, Eastern Command chu Chief Minister Office-ah kawmin Assam Rifle ten kum tam tak chhung Mizo mipuite tan tha takin hna an lo thawh tawh thu leh an lawm hle tih a sawi a. “Mipuite nunphung nghawng thei engemaw thiltih in neih dawnin State sawrkar nen inrawntawn in ti thin ila kan duh,” tiin “Tunhnaiah Burma nena kan inrina Friendship Bridge chu sipaiten an khar a. Union Home Ministry lamin chutiang thil engmah an hre lova, keini in kan lo hre bawk si lova. Khatiang kha awm tawh lo se kan duh a ni,” a ti. Chief Minister chuan Zokhawsang-a Assam Rifles ram paltlanga loneitute feh kawng thar laih a tul thu pawh sawiin, “Tuna an laih thar saw loneitute tan hman tlak a ni meuh lova, a thui lutuk bawk si a. Chuvang chuan a thar laih ngei kan duh a. A tul a nih chuan a sir tawn tawn kan hung mai ang,” a ti a. Hei bakah hian AR Ground chu Aizawl lailia awm a ni tih sawiin, “Mipuiten kan mamawh fo a. Politics thila punkhawm ni lo thil dangah chuan tun aia zalen zawka min hmantir kan duh a ni,” a ti bawk. Ruihhlo dona lamah nasa zawka tan la tura sawm bawkin Chief Minister chuan, “Mizoram sawrkarin nasa taka ruihhlo hi do tumin a inpuahchah mek,” a ti a, kum hnih chhung zet Meeting tawh lo Ruihhlo Do Core Committee chu nimin khan an thutkhawm thu a sawi bawk a ni.

Lt. Gen. RC. Tiwari hian Mizorama awm sipai ten Chief Minister ngenna leh rawtna apiangte an ngai pawimawh tur a ni tih sawiin, “Kawng tinrengah sawrkar kan thawhpui tur a ni,” a tih bakah Chief Minister ngenna te an ngaihpawimawh tur thu a sawi a. AR Ground chungchang thu ah a naute instruction a lo pek tur thu hrilhin, Zokhawsang ram pawh a rang lama ngaihtuah a nih tur thu a sawi bawk. Ruihhlo do chungchangah theihtawp an chhuah zel dawn thu pawh sawiin, “Mizote chu hnam inhlawmkhawm tha, hnam thuawih tak in ni a. In tanrual that chuan ruihhlo do kawngah hma in sawn em em ang,” a ti a. “Kohhran thu in awih thin avangin Kohhran te pawh hian nasa zawkin hemi lamah hian hma la se, a sawt hlein ka ring,” a ti bawk.

Nimin vek khan Lt. Gen. RC. Tiwari hian hian Governor Hari Babu Kambhampati chu Raj Bhavan-ah hmu bawkin Governor hnenah hian ramri hrula venhimna kawnga an hmalak tawhna te hrilhin, harsatna hmachhawn tura Assam Rifles te inbuatsaihna a hrilh nghal bawk a. Governor chuan Mizoram-a Assam Rifles ten mipuite tana hna tha taka an thawh avangin lawmthu a sawi bawk a ni.