Cyclone Remal avanga harsatna thleng thlirho

Mizoram-a Cyclone Remal avanga chhiatna thleng chungchang sawihona chu nimin khan Chief Secretary Dr. Renu Sharma hovin Chief Secretary Conference Room-ah neih a ni.

He thutkhawmah hian Chief Secretary Dr. Renu Sharma chuan Department hrang hrang hruaitute fakin an thawk tha a tih thu leh an thawk rang a tih thu a sawi a, dinhmun hrechianga mahni chanpual chin vil tha turin a fuih bawk. Chhiatna thlen leh hun atana kal dan tur mumal tak (Standard Operating Procedure) nei theuh tura chah bawkin, chhiatna laka mipui him zawk theih nan In sak danah te, kawr siam danah te leh kawng siam danah te dan leh kalphung tha zawk ngaihtuah chhuak turin a fuih bawk a. Zangnadawmna leh chhawm-dawlna pek chungchangah Chief Secretary Dr. Renu Sharma chuan rang taka pek anih theih nan mamawh ang ang report vat turin a chah a. Central sawrkar ah thil thlen dan report a ni dawn tih sawiin, PWD, DM&R, PHE, P&E leh FCS&CA Secretary te chu Vawiin chawhma lama an Report peihfel hman turin a chah bawk a ni.

He thutkhawm ah hian Cyclone Remal avanga chhiatna thleng hrang hrang chungchangah Disaster Management and Rehabilitation (DM&R) Department atangin report ngaihthlak a ni a, Department Secretary ten an department hmalakna leh harsatna te an sawi bawk a. Public Works Department (PWD) chuan leimin avanga hmun hrang hranga kawng ping thenfai hna thawk mekin Public Health Engineering (PHE) in Tui pekchhuahna khawl chhia a awm nual avangin tui pekchhuah theih a tlem rih dawn tih an sawi a, tui ren tura mipuite ngenna thuchhuah niin rang taka khawl siamthat tum mek a ni tih an sawi a. Power and Electricity (P&E) Department chuan kawlphetha pekchhuahna khawl Sub-Station tam zawk chu siam that tawh a ni tih sawiin, kar khat (1) chhung chuan Sub-Station zawng zawng siam zawh hman rin a ni tih an sawi bawk. 

Comments

Popular News (Last 30 Days)

LPG man bithliah thar