Kanghmun South Branch YMA Golden Jubilee lawmna Serchhip District Bawrhsap in a hmanpui

Serchhip District chhunga awm Kanghmun South Branch YMA chuan an dinchampha kum 50-na (Golden Jubilee) lawm neiin he Jubilee lawmna hun hi nimin khan Serchhip District Bawrhsap David Lalthantluanga chuan khuallian niin a hmanpui a ni.

Kanghmun South Branch YMA Golden Jubilee lawmna hun nimin-a neih ah hian Khuallian Serchhip District Bawrhsap hian Golden Jubilee hriatrengna lungphun chu hawngin hemi hnua Golden Jubilee lawmna hun Kanghmun South Community Hall-a neih ah Kanghmun South YMA leh a khaw mipui zawng zawngte Golden Jubilee chibai bukin Vawiin thlenga Kanghmun South Branch YMA nung taka a kal zel a lawmpui thu a sawi a. YMA chu Mizo zawng zawng huap zo, Political Party leh Kohhran zawng zawng lenna a ni tih sawiin, hetiang pawl dang hi a awm ve loh thu leh kan chhuang hle tur a nih thu a sawi a. “Kan kum 50-na mel lung pawimawh tak kan phun belhna ni-ah hian kan khaw tan, kan District tan, Zoram tan rah tha chhuah tir ngei i tum ang u,” tiin kalkhawm te a chah a ni. District Bawrhsap chuan Kanghmun South khua chu khaw inlungrual leh thangduang, hmasawnna kawnga ke pen mek an ni tih pawh sawiin, infiamna te, zirna te, eizawnna leh kawng hrang hranga hma an sawnna ah a lawmpui thu a sawi a, Europe ram fanga zin mek India Junior Women’s Hockey Team a tel pha nula chhuanawm F. Lalthantluangi an khua in an neih thu sawiin, Mizo thalai infiamna lama tuimi te tana entawn tlak leh chona ropui tak a nih thu a sawi a ni.

Serchhip District Bawrhsap chuan ruihhlo dona kawngah tan lak nasat a tul thu pawh he hunah hian sawiin, Mizo thalai zingah ruihhlo vanga kum naupang taka thi an tam tawh zia leh Mizoram run mektu ruihhlo do tur hian sawrkar leh YMA mai bakah, chhungkua leh mimal tinte kan pawimawh thu a sawi a. Zirna chungchang pawh sawiin theihtawpa tan la turin kalkhawmte a fuih a. Zirna chu kawng engkima hmasawnna ‘All round development’ min thlentu a ni tih sawiin, “Khawvel tukverha kan dahchhuah theihna kawng pawimawh ber a ni,” a ti a. “Serchhip District hi India ram pumah ziak leh chhiar thiam tamna ber District kan ni a, Literate District ringawt ni lo Educated District kan nih a pawimawh a ni,” a ti bawk.

Kanghmun South Branch YMA Golden Jubilee lawmna hi ni hnih (2) chhung neih niin niminpiah khan YMA Member ten Infiamna chi hrang hranga inelna neiin hun hman a lo ni tawh a. Nimin-a Golden Jubilee lawmna pui ber hi an Branch YMA President R. Lalhmunsiama chuan kaihruaiin Khual zahawm Thenzawl DFO R. Lalnungrenga chuan YMA Flag pawtparhin thu a sawi bakah Serchhip Sub-Hqrs. YMA aiawhin an President Kawlthuama chuan Jubilee Souvenir tlangzarhin thu a sawi bawk.

Nimin-a he hunah hian an Member boral tawh te sunna hun hmangin Hruaitu lo ni tawh te hnenah chawimawina hlan an ni a, Vantawng Group YMA President C. Lalnunthara pawhin thu a sawi bawk a ni.

Kanghmun South Branch YMA hi kum 1974-a din kha niin Serchhip Sub-Hqrs. YMA hnuaia Group pakhat, Vatawng Group YMA huam-chhunga awm an ni a, Member Mipa 218 leh Hmeichhia  184, an vaiin Member 402 an awm mek a ni.