MJA hruaitu ten Chief Minister hnenah an thlen

MJA General Hqrs. hruaitute chuan nimin khan Chief Minister Lalduhoma hmuin an pawl mamawh hrang hrang an thlen.

MJA hruaitute hian President C. Lalrambuasaiha hovin Chief Minister hi a Pisa-ah an hmu a, MJA in hun rei tak atanga an lo beisei tawh Mizoram Journalists’ Pension Scheme chu Mizoram Sawrkar-in a taka a tihlawhtlin sak chu an lawm thu an sawi a, hetihrual hian, Mizoram Journalists’ Pension Scheme chu a la famkim tawk loh avangin a tul anga enzui sak tur te, MJA in Press Enclave nei tura hma an lakna chu a hlawhtlin ngei theih nan theihtawp chhuahpui tur leh Project an siam chu Mizoram Sawrkar-in a ngaih pawimawh hmasa, Top Priority List-a telh sak tur te, Mizoram sawrkar-in Advertisement Rules a hman lai chu ennawn a, Department hrang hrangin mumal zawka advertisement an kalpui theih nan IPR Department-ah a hlawma budget-ah dah tura ruahmanna siam sak tur leh Newspaper Advertisement rate, centimetre khata Rs. 130 ni mek chu Rs. 150 aia hniam lo-a tihsan sak tur leh MJA member te tan a tam thei ang ber Press Tour buatsaih sak turin a ngen a ni.

Chief Minister chuan, MJA hruaitute thu thlen chu a tul anga bawhzui a nih tur thu lo hrilhin, Advertisement Rules ennawn a, Department hrang hrangin mumal zawka Advertisement an kalpui theih nana IPR Department-ah a hlawma budget-ah dah tura an ngenna chu a hranpaa dilna thehlut tur leh a lo enzui tur thu a hrilh a. MJA in Press Enclave nei tura hma an lakna chu tha a tih thu leh a thlawp thu sawiin, Project reng reng Mizoram sum ei hek lo tur chi chu a thei apiangin buaipui se tha an tih thu leh Press Enclave pawh a hlawhtlin theih nan theihtawp a lo chhuah tur thu a sawi a ni.