Lirthei chesual-ah boral

Zirtawpni kalta May 17, 2024 zingkar khan Thenzawl atanga Buarpui pana tlan Car pakhat chu Tlawng thlen hma deuhin a chesual a, Motor neitu leh khalhtu chu a boral.

Thudawn danin he Motor MZ-01H/9248 (Ford Figo) hi Lalawmpuia (48), Lunglei Rahsi Veng ta niin Mizoram Home Guard hnuaia thawk, Buarpui a Mizoram Rural Bank-a Security hna thawk mek a ni a, Zirtawpni kalta zing dar 845 vel khan Thenzawl atanga Buarpui pana a tlan laiin Tlawng thlan hma hret ah chesualin kawng chhaklam na takin a su a, a Lu-ah hliam na tak tuarin Thenzawl CHC panpui nghal a ni a, amaherawh chu damdawi In thlenpui a nih hnu lawkah a hliam tuar lovin a boral zui ta a ni. Lalawmpuia ruang hi Zirtawpni vek khan an chenna, Lunglei Rahsi Veng-ah lak nghal a ni. 

Vanduaina thlenna hmun hi Thenzawl Police te chuan thleng nghalin buaipui ngai ang ang te an buaipui a, tunlaiin lirthei chetsualna a tam hle tih sawiin, hei vang hian lirthei khalhtute leh a neitute chu fimkhur turin an chah a, lirthei chetsual chhan tam ber chu tlanchak vang leh fimkhur tawk loh vang a ni thin tih sawiin, Dan in a phal loh angin rui chung phei chuan khalh lo turin an chah bawk.