FCI hotuten Supply Minister hnenah mamawh an thlen

Food Corporation of India (FCI) Executive Director (North East) DP. Shukla leh a hote chuan Supply Minister B. Lalchhanzova chu nimin khan a Pisa-ah kawmin Mizoram-a an hnathawh mek dan leh an mamawh tul te an thlen.

FCI hotute hian Sairang Dinthar Veng-a Kudam (Buhfai quintal nuai khat leng) an sak mek chungchanga Forest Clearance avanga an buaina chuan Kudam sak hna a tih thuanawp dan te an sawi a. Minister chuan LR&S hotuten he thil hi an buaipui sak mek thu leh Compensatory Afforestation atan ram an hmuh fel sak tawh thu a lo hrilh a. Minister chuan Forest Department lam hotute chu FCI ten kudam sak an chhunzawm theih nan an thlawpna a phut thu sawiin, buh leh bal a kan rin ber an nih avangin ngaihpawimawh a tul zia a sawi bawk a. EF&CC lam pawhin theihtawp an chhuahpui tur thu a sawi bawk. Hei bakah hian Supply Minister chuan Khawzawl a FCI Kudam (Quintal 33400 leng) sakna hmun a lei nghet tawk lo nia sawi chu endik thuai a, a rang lama hma la turin FCI houtute a chah bawk.

He hunah hian Sandeep Deora chuan Sairang Dinthar Veng leh Khawzawl-a Kudam te sak zawh an nih chuan Mizoram-ah FCI in vawi khata thla riat (8) ei khawp chhekkhawlna hmun a nei thei dawn tih sawiin, hei hian Furpui leh khuarel chhiatna dang vanga rail leh kawngpui ah harsatna te thlen mahse Mizoram chuan buhfai ah security a neih dawn thu a sawi bawk a. Supply Minister chuan FCI hotute chu a tul anga Mizoram hmun laili deuha Kudam sak bellh dan tur ngaihtuah tura a chahin, FCI hotutte chuan an lo bawhzui tur thu an hrilh bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar